ინფორმაცია იმის შესახებ, რომ უკრაინის სპეცსამსახურებმა პრეზიდენტ პოროშენკოზე თავდასხმა აღკვეთეს, ფეიკი აღმოჩნდა. ამის შესახებ ტელეკომპანია 1+1 იტყობინება და ცრუ ინფორმაციის გამავრცელებელ წყაროსაც ასახელებს. ტელეკომპანიის ინფორმაციით, ე.წ. ფეიკ-ნიუსი მედიასაშუალებებს საიტ პრესინფოდან მიუვიდათ, რომელიც ყალბი ექაუნთი აღმოჩნდა. ფეიკ-ინფორმაციას ფეისბუკით ოდესის ყოფილი გუბერნატორიც გამოეხმაურა. „თავიდან გამიკვირდა, რატომ გადაწყვიტა მოულოდნელად პოროშენკომ ავდეევკაში ჩასვლა. მერე კი მივხვდი, რომ ვიღაცამ ფეიკი გაავრცელა, შემდეგ გააცნობიერა, რომ ეს სისულელე იყო და ინფორმაცია წაშალა,“-წერს სააკაშვილი. ინფორმაცია იმის შესახებ, რომ ავდეევკაში პოროშენკოზე თავდასხმა უშიშროების სამსახურმა აღკვეთა, გასულ კვირას უკრაინის რამდენიმე მედიასაშუალებამ გაავრცელა.
