„გვამთან ერთად, 10 ცალი სისხლიანი ხელსახოცი აღმოჩნდა. ექსპერტიზის დასკვნით, მასზე არც ბექა შენგელიას ხელის ანაბეჭდები და სისხლია, არც ირმა ყოჩიაშვილის. გეკითხებით, ეს საქმე გამოძიებულია? ვინმე გამცემს პასუხს, ვისი სისხლია ამ ხელსახოცებზე?“, - განუცხადა „ჯი-ეიჩ-ენ-ს“ მსჯავრდებულ ბექა შენგელიას ადვოკატმა, ლალი ბიწოშვილმა.
ადვოკატმა შენგელიასთან ერთად მოამზადა სააპელაციო საჩივარი. როგორც ბიწოშვილი აღნიშნავს, შენგელიას ბრალი დამძიმებული აქვს.
”ბექა შენგელია არ ამბობს, რომ დანაშუალი არ ჩაუდენია. მას დანაშაული ჩადენილი აქვს, მაგრამ მისი კვალიფიკაცია დამძიმებულია. ეს საქმე დღესაც არ არის გამოძიებული, ძალიან ბევრი დარღვევა, შეცდომაა. ვფიქრობდი, რომ ამ საქმეს პირველი ინსტანციის მოსამართლე ძიებაში დააბრუნებდა. მოსამართლე, რომელიც კანონის დამცველია, ამ საქმეს ყველა ვარიანტში ხელახალ გამოძიებაში დააბრუნებდა. თუმცა, ამ საქმის გამოძიება არავის აინტერესებდა, ერთადერთი მიზანი იყო, ბექა შენგელიას უვადო პატიმრობა ჰქონოდა, ირმა ყოჩიაშვილისთვის კი 20 წელი მიესაჯათ. პირობას გაძლევთ, ამ საქმეს სტრასბურგამდე მივიყვან", - აცხადებს ბიწოშვილი.
ადვოკატი სააპელაციო სასამართლოში ბექა შენგელიას სასჯელის ზომაზე იდავებს.
”მოსამართლე გიორგი ებანოძიემ კანიბალიზმი მთლიანად მოხსნა, თუმცა, შენგელიას მაინც უვადო თავისუფლების აღკვეთა მიუსაჯა, რადგან 109-ე მუხლის მე-3 ნაწილი დაუტოვა ძალაში, რაც დამამძიმებელ გარემოებაში განზრახ მკვლელობას გულისხმობს. გარდაცვლილი ადამიანის დაჩეხვა არ შეიძლება დამამძიმებელ გარემოებად იქნეს მიჩნეული. ის ცოცხალი რომ ყოფილიყო და მაშინ დაეჩეხათ, ასეთ შემთხვევაში შეიძლებოდა მე-3 ნაწილი მიესაჯათ. ამ შემთხვევაში კი, ბექა შენგელიასთანაც და ირმა ყოჩიაშვილითანაც, 109-ე მუხლის, მე-2 ნაწილი უნდა გამოეყენებინათ.
შესაბამისად, ვითხოვ, 109-ე მუხლის მე-3 ნაწილი მე-2 ნაწილით გადაკვალიფიცირდეს, რაც განზრახ მკვლელობას ჯგუფურად გულისხმობს. ეს სასჯელი 13-დან 17 წლამდე თავისუფლების აღკვეთას ითვალისწინებს.
განაჩენში, მოსამართლეს უწერია, მართალია, პროკურატურამ მტკიცებულებები ვერ წარმოადგინა, მაგრამ ჩემი შინაგანი რწმენით, მგონია დამნაშავეები არიანო. შეიძლება პროკურატურამ მტკიცებულებები ვერ წარმოადგინოს და ადამიანს უვადო პატიმრობა მიუსაჯო? საოცარი ის არის, რომ პროკურატურამ განაჩენი, უვადო თავისუფლების აღკვეთაც გაასაჩივრა”, - განაცხადა ”ჯიე-იჩ-ენ-თან” ადვოკატმა.
შეგახსენებთ, რომ მკვლელობა გასული წლის 19 ოქტომბერს, თბილისში, ბერი გაბრიელ სალოსის ქუჩაზე მოხდა. 76 წლის ლუბა ყოჩიაშვილის მკვლელობის საქმეზე სამართალდამცავებმა 2016 წლის 3 ნოემბერს სამი პირი, მოკლულის შვილი, ირმა ყოჩიაშვილი, ბექა შენგელია და არასრულწლოვანი ნ. ჩ. დააკავეს. აღნიშნული დანაშუალის შეუტყობინებლობაზე ბრალი კიდევ სამ პირს აქვს წაყენებული.
გამოძიება ბექა შენგელიას მსხვერპლის სხეულის ორგანოს სხვაგვარად გამოყენებას , ანუ ე.წ. კანიბალიზმსაც ედავებოდა. თუმცა, მას ეს ბრალი არ დაუდასტურდა.