„პოლიტიკური ბრალდებებით ჩვენ ვერ გაგვაკვირვებს ადამიანი, ამ ბრალდებას ჰქვია რეჟიმისა და სისტემის მიმართ დაუმორჩილებლობის ბრალდება", - ამის შესახებ უკრაინის გენერალური პროკურორის ყოფილმა მოადგილემ, დავით საყვარელიძემ, ლვოვის პოლიციაში დაკითხვაზე შესვლამდე განაცხადა.
მისივე თქმით, ბრალდების დადგენილებაში ბევრი სისულელე წერია.
"ბევრი სისულელე წერია, რომ მაგალითად, ჩვენ შევუთანხმდით ჟურნალისტებს, „France-Presse“-ის, „reuters“-ის, „BBC“-ის ჟურნალისტებს წინასწარი შეცნობით და განზრახვით, რომ უკანონოდ გადმოგვეყვანა უკრაინულ-პოლონურ საზღვარზე, თუმცა ყველაფერი ხდებოდა უკრაინულ ტერიტორიაზე, გავლილი იყო უკვე პოლონური საზღვარი. თითქოს ვცემეთ მესაზღვრე, რომელიც ამბობს, რომ ურტყამდა წვერებიანი, ბერეტიანი, მუქ მაისურში ჩაცმული დიდი აღნაგობის ადამიანი და ხელის შეშლა საბაჟო და სასაზღვრო რეჟიმისთვის, როდესაც თვითონ ამბობდნენ, რომ ყველაფერი არის დანაღმული და გაჩერებული. სისულელეებია, დროს დავკარგავთ მეტი არაფერი,“ - აცხადებს დავით საყვარელიძე.
შეგახსენებთ, დავით საყვარელიძე ლვოვის პოლიციაში დაკითხვაზე უკრაინა - პოლონეთის საზღვარზე განვითარებულ მოვლენებთან დაკავშირებით დაიბარეს. მას გამოძიება საზღვრის უკანონო გადაკვეთას, ჯგუფური არეულობის მოწყობასა და სამართალდამცველებისთვის წინააღმდეგობის გაწევას ედავება.