ოპოზიციური პოლიტიკური ძალების პოზიციები კონსტიტუციასთან დაკავშირებით არის სწორი, მაგრამ მისი რეალიზებისა და განხორციელების შანსები პრაქტიკულად ამოწურულია, - ამის შესახებ „შენების მოძრაობის" ლიდერმა დავით უსუფაშვილმა საკონსტიტუციო ცვლილებებზე საუბრისას განაცხადა.
როგორც უსუფაშვილმა აღნიშნა, თუ კუთხეში მიყენებულმა „ქართულმა ოცნებამ“ კონსტიტუციაში ის ყველაფერი ჩაწერა, რაც დღეს მას უწერია, მაშინ იხურება პოლიტიკური დისკუსიებისა და კონსულტაციების შესაძლებლობა.
„მრჩება შთაბეჭდილება, რომ საკონსტიტუციო პროცესში მონაწილე მხარეებს აღარ აქვთ იმედი, რომ შეიძლება რაიმე შეიცვალოს და ამიტომ გრძელდება იმ პოზიციების კიდევ ერთხელ საზოგადოებისთვის გაცნობა, რაც დიდი ხანია ცნობილია.
ვთვლი, რომ ოპოზიციური პოლიტიკური ძალების პოზიციები კონსტიტუციასთან დაკავშირებით არის სწორი, მაგრამ მისი რეალიზებისა და განხორციელების შანსები პრაქტიკულად ამოწურულია, ვინაიდან მმართველმა გუნდმა საკუთარი თავი შეიყვანა ჩიხში და ახლა მათ საკითხი ასე უდგათ - დათანხმდნენ გონივრულ წინადადებებს და ამით საკუთარი თავი დააყენონ სერიოზული დარტყმისა და შესაძლო დაშლის საფრთხის ქვეშ, თუ პრინციპულად და ჯიუტად გააგრძელონ სვლა არასწორი მიმართულებით და ამით საკუთარი ერთიანობა მაინც შეინარჩუნონ. ეს საკმაოდ მძიმე მდგომარეობაში აყენებს მმართველ გუნდს, სამწუხაროდ, მათ თავიანთი არასწორი ნაბიჯებით ჩაიყენეს საკუთარი თავი ამ პოზიციაში და ქვეყანაც მიიყვანეს ამ ვითარებამდე. ამიტომ პრეზიდენტის აქტიურობა ამ მიმართულებით ცხადია არის მნიშვნელოვანი, მაგრამ ვეჭვობ, უმრავლესობამ იმ წინადადებებზე შეჯერება შეძლოს, რასაც როგორც ჩანს უნდა ველოდოთ პრეზიდენტის ვეტოში, რომელშიც აისახება ყველა ეს მოსაზრება.
არ მგონია, რომ სწორი იყოს იმ გზით სიარული, რომელიც კომპრომისამდე მისვლის საშუალებას არ ტოვებს. ამიტომ „შენების მოძრაობამ" როგორც განაცხადა, ჩვენ აქტიური მუშაობის პროცესში ვართ და იქნებ მოხერხდეს მომავალი დისკუსიებისა და მომავალი კონსულტაციების შენარჩუნება.
თუ კუთხეში მიყენებულმა „ქართულმა ოცნებამ“ კონსტიტუციაში ის ყველაფერი ჩაწერა, რაც დღეს მას უწერია, მაშინ იხურება პოლიტიკური დისკუსიებისა და კონსულტაციების შესაძლებლობა. ამიტომ იქნება მოხერხდეს ამ შესაძლებლობის არ მოსპობა, იმიტომ რომ თუ პოლიტიკური პროცესი საპარლამენტო არჩევნებამდე 3 წლით ადრე ჩაიკეტა, ეს ძალიან სავალალო შედეგებს მოუტანს ჩვენს ქვეყანას“, - განაცხადა დავით უსუფაშვილმა.
