ჩრდ. კორეის ნაკრების 4 ფეხბურთელი სამხრეთ აფრიკაში მიმდინარე საფეხბურთო მსოფლიო ჩემპიონატის დროს დაიკარგა. ამის შესახებ სამხრეთ კორეული გამოცემები იუწყებიან.
ან ჩოლ ხონი, კი მონგ გილი, კიმ კონგ ილი და პაკ სუნ ხოკი ბრაზილია-ჩრდ. კორეის (2-1) საფეხბურთო მატჩის განაცხადში ვერ მოხვდნენ. FIFA-ს წესდებით კი, იმ შემთხვევაში, თუ გარკვეული მიზეზის გამო რომელიმე ფეხბურთელს მატჩში მონაწილეობის მიღება არ შეუძლია, ნაკრების ხელმძღვანელობამ ამის შესახებ უმაღლეს საფეხბურთო ორგანოს რამდენიმე დღით ადრე უნდა აცნობოს. ასეთი რამ კი, როგროც აღმოჩნდა არ მომხდარა.
კორეული გამოცემები არ გამორიცხავენ, რომ აღნიშნულმა ფეხბურთელებმა ნაკრების ბაზა პოლიტიკური შეხედულებების გამო დატოვეს. როგორც ცნობილია, ჩრდ. კორეაში კომუნისტური რეჟიმი მოქმედებს და ქვეყნის მოქალაქეებისათვის უცხოეთში გასვლა შეზღუდულია. უშუალოდ ამ ჩემპიონატზე კი, ნაკრების მთავარ მწვრთნელსა და ფეხბურთელებს ინტერვიუების მიცემა ეკრძალებათ.
მომხდართან დაკავშირებით, ჩრდ. კორეის ოფიციალურ პირებს ჯერ განცხადება არ გაუკეთებიათ.
