გიორგი მელაძე: ლარის კურსის მერყეობა შეჩერდება და იმაზე მეტად არ დაეცემა, რაც დღეს არის. ამის შესახებ განცხადება დარგობრივი ეკონომიკის კომიტეტის თავმჯდომარემ გიორგი მელაძემ დღეს, პარლამენტში ჟურნალისტებთან საუბრისას გააკეთა.
როგორც მან აღნიშნა, ლარის კურსის მერყეობა არ არის გამოწვეული ქვეყნის შიდა პრობლემებით და აცხადებს, რომ ხელისუფლება ამ პრობლემის მოსაგვარებლად ყველაფერს აკეთებს. შესაბამისად პირობას იძლევა, რომ ლარის კურსი აღნიშნულ ნიშნულზე გაჩერდება და ლარის უფრო მეტი დეველვაცია არ არის მოსალოდნელი. რაც შეეხება პროდუქტების და განსაკუთრებით მედიკამენტების საგრძნობლად გაძვირებას, რაც ბოლო პერიოდში დაფიქსირდა და რეალიზატორები ლარის კურსის მერყეობას უკავშირებენ, გიორგი მელაძე აცხადებს, რომ აღნიშნულ საკითხს თავად ბაზარი დაარეგულირებს და ამ პრობლემის მოგვარებაში ხელისუფლება ვერანაირად ვერ ჩაერევა.
