შავ ზღვაში ჩამოვარდნილი რუსული თვითმფრინავის ფრაგმენტებისა და დაღუპულთა ცხედრების ძებნის ოპერაციაში აფხაზეთიც ჩაერთო. ამის შესახებ არაღიარებული რესპუბლიკის პრეზიდენტმა რაულ ხაჯიმბამ განაცხადა. გავრცელებული ინფორმაციით, სოჭის სანაპიროებთან ჩამოვარდნილი თვითმფრინავის ფრაგმენტები დინებას შესაძლოა აფხაზეთის წყლებისკენ წაეღო. თავდაცვის სამინისტროს კუთვნილმა ტუ-154-მა კატასტროფა 25 დეკემბრის დილას განიცადა, რასაც 92 ადამიანი ემსხვერპლა. კატასტროფის გამომწვევ მიზეზად ორი ვერსია, თვითმფრინავის ტექნიკური გაუმართაობა და პილოტის შეცდომა სახელდება. მაშველებმა შავ ზღვაში 11 ცხედარი უკვე იპოვნეს. მომხდარის გამო დღეს რუსეთში საყოველთაო გლოვაა გამოცხადებული.
