უკრაინის მთავრობამ "პრივატ ბანკის" ნაციონალიზაცია გამოაცხადა. მთავრობის სხდომაზე მიღებული გადაწყვეტილებით, სახელმწიფო ბანკის აქციების 100%-ის მფლობელი გახდება. უკრაინის ფინანსთა სამინისტრო საკუთარ თავზე იღებს ვალდებულებას ანაბრების უსაფრთხოებისა და ბანკის ფუნქციონირების უზრუნველყოფაზე. როგორც უკრაინის ეროვნული ბანკის თავმჯდომარემ ვალერია გონტარიოვამ და ფინანსთა მინისტრმა ალექსანდრ დანიულიუკმა განაცხადეს, ნაციონალიზაციის თხოვნით ხელისუფლებას თავად "პრივატ ბანკის" აქციონერებმა მიმართეს. "პრივატ ბანკის" უმსხვილესი აქციონერები დნეპროპეტროვსკის ყოფილი გუბერნატორი იგორ კოლომოისკი და გენადი ბოგოლიუბოვი არიან. ბანკს ფინანსური პრობლემები რამდენიმე წლის წინ შეექმნა. 2015 წელს ბანკმა დავალიანების ნაწილის გადახდა ვერ შეძლო.
