"ეროვნული საბჭო" რამდენიმე საარჩევნო უბნის გახსნასა და ხმების ხელახალ დათვლას ითხოვს. ამის შესახებ "სამართლიანი საქართველოსთვის" წევრმა ვლადიმერ ბოჟაძემ დღეს გამართულ პრესკონფერენციაზე ისაუბრა.
მისი თქმით, 3 ივნისს "ეროვნულმა საბჭომ" მცხეთის რაიონულ სასამართლოში შეიტანა სარჩელი ადგილობრივი თვითმმართველობის არჩევნების დროს დუშეთის # 28 საარჩევნო ოლქში გამოვლენილი დარღვევების შესახებ. "ეროვნული საბჭოს" მოთხოვნით, სასამართლოს სხდომაზე გაიხსნა დალუქული სპეციალური საარჩევნო სიები, რის შედეგადაც, ბოჟაძის თქმით, სარჩელში მითითებული დარღვევები, ფაქტობრივად, დადასტურდა.
"მიუხედავად ამისა, მცხეთის რაიონულმა სასამართლომ მიიღო პოლიტიკურად მოტივირებული გადაწყვეტილება და "ეროვნული საბჭოს" სარჩელი არ დააკმაყოფილა. ამით სასამართლომ საუბნო და საოლქო საარჩევნო კომისიებში მომხდარი დარღვევები დააკანონა. ამ გადაწყვეტილებას "ეროვნული საბჭო" სააპელაციო სასამართლოში გაასაჩივრებს. თუ ქართულ სასამართლოში სამართალს ვერ ვიპოვით, მაშინ შესაბამის საერთაშორისო ინსტანციებში გავაგრძელებთ ბრძოლას", - აღნიშნა ბოჟაძემ.
მისი თქმით, მცხეთის რაიონული სასამართლოს მიერ გამოვლენილი ტენდენციურობა გამონაკლისი არ არის. ვლადიმერ ბოჟაძის განცხადებით, პოლიტიკური პარტიებისა და არასამთავრობო ორგანიზაციების მხრიდან სასამართლოებში რამდენიმე ათეული სარჩელია შესული, მაგრამ არ არსებობს არც ერთი გადაწყვეტილება საარჩევნო შედეგების გაბათილების შესახებ.
პრესკონფერენციაზე "ეროვნული საბჭოს" კოორდინატორმა მოითხოვა, რომ ყველა იმ საარჩევნო უბანზე, სადაც დარღვევები გამოვლინდა და მათ შესახებ სასამართლოში სარჩელი შევიდა, საარჩევნო უბნები გაიხსნას და მოხდეს ხმების ხელახალი გადათვლა.
