თუ ლარის კურსის დაცემა გაგრძელდა ქვეყანას ეს სერიოზულ პრობლემებს შეუქმნის, _ ამის შესახებ "ჯი-ეიჩ-ენს" ექსპერტმა ეკონომიკის საკითხებში ნოდარ ხადურმა განუცხადა. მისი თქმით, მაშინ, როცა ეკონომიკური კრიზისის შემდეგ ქვეყნის ეკონომიკამ ცოტა ამოისუნთქა და გამოცოცხლება დაიწყო, ლარის ინფლაციის შემთხვევაში სერიოზული პრობლემები გარდაუვალი გახდება.
"საქართველოში სამწუხარო ტრადიციად ჩამოყალიბდა, რომ პარასკევს ლარის კურსი ყოველთვის ეცემა, ამიტომ ჯობია დაველოდოთ ორშაბათს საღამოს, თუმცა ეროვნული ვალუტის კურსის შეცვლას დოლართან მიმართებაში განსაკუთრებით არ უნდა ველოდოთ", - განაცხადა ნოდარ ხადურმა "ჯი-ეიჩ-ენთან" საუბრისას.
ექსპერტის შეფასებით, ლარის კურსის დაცემა საქართველოში არსებულ რამდენიმე სერიოზული პრობლემას უკავშირდება. კერძოდ, კი ეს არის კატასტროფულად უარყოფითი საგადამხდელო სალდო, ანუ ქვეყანაში ექსპორტი დაახლოებით სამჯერ-ოთხჯერ ნაკლებია იმპორტზე.
"თუ წინა წლებში ქვეყანაში ვალუტის სერიოზული შემოდინება იყო ინვესტიციებით, ჩვენი თანამემამულეების მიერ გაკეთებული ჩამორიცხვებით, ასევე იმ დახმარების სახით, რომელიც 2008 წლის ომის შემდეგ საქართველო მიიღო. როგორც ჩანს, ეს სახსრებიც ამიწურა ან ამოწურვის პირას არის, ამიტომ დოლარზე მოთხოვნა გაზრდილია, ხოლო მისი მიწოდება არ არის. ამის გათვალისწინებით, კი ქვეყანაში როგორც ჩანს, ახალი წონასწორული კურსის ჩამოყალიბება ხდება", - აღნიშნა ექსპერტმა.
ამასთან, მისვე შეფასებით, იმ შემთხვევაში თუ ლარის კურსის დაცემა გაგრძელდა ეს იმპორტირებული საქონელზე ფასების მომატებას აუცილებლად გამოიწვევს.
"როცა ჩვენი სამომხმარებლო კალთის უდიდესი ნაწილი იმპორტირებული საქონელია და მათი ფასი დაფიქსირებულია დოლარში, დოლარის გაძვირების შემთხვევაში ამ საქონის გაძვირება გარდაუვალი იქნება", - აღნიშნა მან.
