ფრანგმა სატვირთოს მძღოლებმა კალესკენ მიმავალი ცენტრალური ავტომაგისტრალი გადაკეტეს. დემონსტრანტებმა ლტოლვილთა ბანაკის, ე.წ. „ჯუნგლების“ აღება მოითხოვეს. მძღოლებს მაღაზიების მეპატრონეები, პორტის თანამშრომლები და ფერმერებიც შეუერთდნენ. მათი თქმით, ბანაკი ქალაქის ნორმალურ ცხოვრებას უშლის ხელს, რადგანაც საგრძნობლად იმატა კრიმინალმა. მიგრანტები სატვირთო მანქანებსა და ავტოფურგონებში შეღწევას და ამ გზით ბრიტანეთის ტერიტორიაზე გადასვლას ცდილობენ. ადგილობრივ ფერმებში კი სუდანელი, სირიელი და ერითრიელი ლტოლვილები მოსავალს იპარავენ.
