ჩინეთში ბარაქ ობამას ვიზიტი უსიამოვნო ინციდენტებით დაიწყო. ამის შესახებ სააგენტო AP იტყობინება.
გავრცელებული ინფორმაციით, უსიამოვნებები ხანჩჟოუს აეროპორტში დაიწყო, როდესაც საპრეზიდენტო თვითმფრინავთან პროტოკოლის მიხედვით წითელხალიჩიანი ტრაპი არ მიაყენეს. ამის გამო თეთრი სახლის ლიდერს თვითმფრინავიდან ჩამოსვლა სათადარიგო ტრაპით მოუწია, რომელიც ლაინერის კუდთან არის განთავსებული.
ამის შემდეგ აეროპორტის უსაფრთხოების სამსახურის თანამშრომლებმა პრობლემები ამერიკელ ჟურნალისტებს შეუქმნეს, რომლებიც ჩინეთში „დიდი ოცეულის“ სამიტის გასაშუქებლად ობამასთან ერთად ჩავიდნენ. როდესაც ჟურნალისტებმა სათადარიგო ტრაპიდან პრეზიდენტის ჩამოსვლის გადაღება სცადეს, სპეცსამსახურის თანამშრომლებმა მათ ტერიტორიის სასწრაფოდ დატოვება მოსთხოვეს. ამერიკული დელეგაციის წარმომადგენელმა აეროპორტის უსაფრთხოების თანამშრომლებს შეახსენა, რომ ამერიკის პრეზიდენტის თვითმფრინავთან იდგნენ, რაზეც მათ ყვირილით უპასუხეს: „ეს ჩვენი ქვეყანა და ჩვენი აეროპორტია!“
ამით უსიამოვნებები არ დასრულებულა. როდესაც ობამას მრჩეველმა უსაფრთხოების საკითხებში სიუზან რაისმა და პრეზიდენტის თანაშემწემ ბენ როუდსმა თეთრი სახლის ლიდერთან მიახლოება სცადეს, უსაფრთხოების სამსახურის თანამშრომლებმა მათ გზა გადაუღობეს. „ასეთ რამეს ნამდვილად არ მოველოდით,“-განაცხადა ინციდენტის შემდეგ გაკვირვებულმა რაისმა.
თავად ობამამ თანაშემწეებს მოუწოდა ინციდენტისთვის განსაკუთრებული ყურადღება არ მიექციათ, თუმცა უსიამოვნებები აეროპორტის ინციდენტის შემდეგაც გაგრძელდა. დიდი ოცეულის სამიტის დაწყებამდე ამერიკელი ჟურნალისტები სადღესასწაულო მიღებაზე არ დაუშვეს.
