საგარეო საქმეთა მინისტრ გრიგოლ ვაშაძის შეფასებით, საქართველოსა და შეერთებულ შტატებს შორის ურთიერთობა სამაგალითოა.
ამის შესახებ ვაშაძემ ჟურნალისტებს აშშ-ის სახელმწიფო მდივნის ჰილარი კლინტონის მიერ ქართველი ხალხისთვის დამოუკიდებლობის დღის მილოცვაზე კომენტირებისას განუცხადა.
"ეს არის სტრატეგიული მოკავშირის მილოცვა სტრატეგიული მოკავშირისადმი. ეს გზავნილი კიდევ ერთხელ ცხადყოფს, რომ საქართველო-შეერთებული შტატები აგრძელებენ იმ ურთიერთობების გაღრმავებას, რომელიც სამაგალითოა", - აცხადებს ვაშაძე.
მისივე განმარტებით, "შეერთებული შტატებისთვის საქართველოს ტერიტორიული მთლიანობა, სუვერენიტეტი და დამოუკიდებლობა ეჭვქვეშ არასდროს დადგება და აშშ ჩვენი ქვეყნის დეოკუპაციისთვის საქართველოსთან ერთად იშრომებს".
"არსებობს მესამე მომენტიც, რაც ასევე ძალიან პრინციპულია - ქართველ ხალხს აქვს იმ უსაფრთხოების მექანიზმისა და მოკავშირეების არჩევის უფლება, რომელიც მის სუვერენულ ნებას შეესაბამება. ერთ-ერთი ასეთი სახელმწიფო შეერთებული შტატებია", - განმარტა საქართველოს პირველმა დიპლომატმა.
შეგახსენებთ, რომ ჰილარი კლინტონმა ქართველ ხალხს დამოუკიდებლობის დღე მიულოცა.
