საქართველოში საგანგებოდ ამ პროექტისთვის ჩამოსული სტუმრები დილით სენაკსა და ზუგდიდში დევნილთა კომპაქტურად ჩასახლებულ პუნქტებს მოინახულებენ, მოგვიანებით კი ბათუმში გადაინაცვლებენ.

შეგახსენებთ, რომ ქართველ დევნილთა სოლიდარობის მიზნით საქართველოს ცნობილი შემსრულებლები Youssou N' Dour, MC Solaar, Jane Birkin, Youssoupha, Grace, Maia.Kსტუმრობენ.

მათი მონაწილეობით გუშინ ენგურის ხიდის მიმართულებით ჯერ სოლიდარობის მსვლელობა მოეწყო, რომლის მიზანიც დევნილების საკითხთან დაკავშირებით საერთაშორისო საზოგადოების ყურადღების მიპყრობა იყო, მოგვიანებით კი ზუგდიდის ცენტრში გრანდიოზული კონცერტი გაიმართა.

ღონისძიების ფარგლებში საქართველოს სულ 150 სტუმარი სტუმრობს, მათ შორის არიან, როგორც ხელოვნების სხვადასხვა სფეროს წარმომადგენლები, ისე საზოგადო მოღვაწეები, ოფიციალური პირები, პარიზის არასამთავრობო ორგანიზაციები და ჟურნალისტები წამყვანი მედია საშუალებებიდან.

საქართველოში სულ 350, 000-მდე დევნილია, ეს ის ადამიანები არიან, რომლებმაც რუსეთ-საქართველოს ომის (აგვისტო 2008), აფხაზეთისა (1992-93) და
ცხინვალის (1991) კონფლიქტების შედეგად იძულებით დატოვეს მშობლიური კერა.

აღსანიშნავია, რომ ზუგდიდში გამართულ კონცერტს საქართველოს პრეზიდენტიც დაესწრო, რომლის თქმითაც, "ის, რაც ქართველ დევნილებთან მიმართებაში მოხდა წარმოუდგენელი სისასტიკე იყო, თუმცა მათი მსოფლიო მხარდაჭერის პროცესი დაიწყო და ის აღარ შეჩერდება".