ადვოკატთა ასოცოაცია იუსტიციის უმაღლესი საბჭოს შენობასთან, საბჭოს მდივნის ლევან მურუსიძის წინააღმდეგ საპროტესტო აქციას მართავს.
სააპელაციო სასამართლოს მოსამართლეობის კანდიდატ ლევან მურუსიძესთან უზენაესი სასამართლოს თავმჯდომარე ნინო გვენეტაძე გასაუბრებას მართავს.
ადვოკატთა ასოციაციის თავმჯდომარე ზაზა ხატიაშვილი აცხადებს, რომ ლევან მურუსიძის სასამართლოში დანიშვნა არის სამართლიანი სასამართლოს ოცნებაზე ფიქრის დასამარება.
„ლევან მურუსიძის სასამართლოში დანიშვნა არის სამოქალაქო საზოგადოებისთვის თვალებში ნაცრის შეყრა, ეს არის სამართლიანი სასამართლოს ოცნებაზე ფიქრის დასამარებაც კი, რადგან ყველა ის უბედურება, რაც ბოლო წლებში სასამართლო სისტემიდან მომდინარეობდა, დაკავშირებული იყო ლევან მურუსიძესთანაც," - განაცხადა ხატიაშვილმა.
"საერთაშორისო გამჭვირვალობა - საქართველოს" წარმომადგენლის ეკა გიგაურის განცხადებით კი, ლევან მურუსიძე არ არის საუკეთესო კანდიდატი, რომელიც შესაძლოა დარჩეს სასამართლოს სისტემაში.
,,დღეს საზოგადოების ინტერესს წარმოადგენს ის, რომ მაქსიმალურად კარგად იმუშაოს სასამართლო სისტემამ და მაქსიმალურად ღირსეული ადამიანები იყვნენ ამ სისტემაში დასაქმებული", - განაცხადა ეკა გიგაურმა.
შეგახსენებთ, ლევან მურუსიძე სანდრო გირგვლიანისა და სულხან მოლაშვილის საქმეების მოსამართლე იყო. ეს საქმეები კი, ევროპულმა სასამართლომ მიიჩნია, როგორც უკანონო გადაწყვეტილებები.
