მოწმეთა დაკითხვის წესის ამოქმედების ვადები ისევ იცვლება. გუშინ, პარლამენტს „სისხლის სამართლის საპროცესო კოდექსში“ შესატანი ცვლილებების პროექტი წარედგინა, რომლის გათვალისწინებით, 2016 წლის 20 თებერვლამდე, გამოძიებისას დაკითხვა წარმოებს საქართველოს 1998 წლის 20 თებერვლის სისხლის სამართლის საპროცესო კოდექსით.
კანონპროექტის ავტორთა განმარტებით, 2009 წლის 9 ოქტომბერს მიღებულმა კოდექსმა მოწმის დაკითხვის ახალი წესის ამოქმედება 2012 წლის 31 დეკემბრამდე გადაავადა, მოგვიანებით კი, ამ მუხლში რამდენჯერმე ცვლილება შევიდა და საბოლოოდ, გადავადების პერიოდი 2015 წლის ბოლომდე გაგრძელდა.
„ამ მიზნით დათქმა გაკეთდა, რომლის მიხედვით, 2015 წლის დეკემბრამდე გამოძიებისას დაკითხვა წარმოებს საქართველოს 1998 წლის 20 თებერვლის სისხლის სამართლის საპროცესო კოდექსით. მოწმის დაკითხვის ახალი წესის რამდენჯერმე გადავადება განპირობებული იყო, ერთი მხრივ, სამართალდამცავი სისტემის თანამშრომელთა გადამზადების საჭიროებით, ხოლო მეორე მხრივ, საკანონმდებლო ხარვეზის არსებობით, რომლის შევსების გარეშე დანაშაულთან ბრძოლა და ქვეყანაში საზოგადოებრივი წესრიგის დაცვა, შესაძლოა, სერიოზული რისკის წინაშე დამდგარიყო. 2015 წლის 31 დეკემბრამდე 19 ნოემბერს ინიცირებული კანონპროექით გათვალისწინებული სიახლეების ამოქმედება ვერ მოესწრება სასამართლო რესურსების გაზრდასთან დაკავშრებით“, - აღნიშნულია განმარტებით ბარათში.
