"თავისუფალი დემოკრატების" თავმჯდომარის ირაკლი ჩიქოვანის შეფასებით, საარჩევნო კანონმდებლობაში დაგეგმილი ცვლილებები აჩვენებს, რომ მმართველ გუნდს ეშინია არჩევნებში წაგების.
პარლამენტის დღევანდელ პლენარულ სხდომაზე მან ასევე განაცხადა, რომ შემოთავაზებული სისტემა არის ძალიან მოძველებული და არაადეკვატური.
,,"ქართულ ოცნებას" ეშინია, რომ მას ისეთი კანდიდატები არ ჰყავს და ისეთ პოპულარობა არ აქვს, რომ პარლამენტში უმრავლესობას მოიპოვებს. მარტივი არითმეტიკით, ბოლო 12 წლის განმავლობაში მაჟორიტარული სისტემით ჩატარებულ ყველა არჩევნებში მმართველი გუნდი სულ მცირე 15-18%-ით მეტ მანდატს იღებდა. დიახ, ამ მექანიზმის გამოყენებას ცდილობს დღეს ხელისუფლება. თქვენ ვერ დაასახელებთ ვერც ერთ სახელმწიფოს, სადაც წარმომადგენლობითი ორგანოს ერთსა და იმევე პალატაში აირჩევიან როგორც პროპორციული, ასევე მაჟორიტარული წესით და იქ არ არსებობს გამოთანაბრების ან დაბალანსების მექანიზმი. ასეთი სახელმწიფო არ არსებობს, რადგან ყველა ხვდება, რომ ეს არის ძალიან მოძველებული და არაადეკვატური სისტემა", - განაცხადა ჩიქოვანმა.
შეგახსენებთ, საარჩევნო კანონმდებლობაში დაგეგმილი ცვლილებები, არსებული 73 მაჟორიტარული საარჩევნო ოლქის საზღვრების შეცვლას ითვალისწინებს.
