„როდესაც ქუჩებში სისხლის ნიაღვარზეა საუბარი, ეს ყველაფერი იმ ადამიანს მოკითხეთ, ვინც რუსეთში, 90-იან წლებში ფული მაშინ იშოვა, როცა ქუჩებში სისხლი იღვრებოდა“, - ამის შესახებ დღევანდელ პლენარულ სხდომაზე, ოპოზიციონერმა დეპუტატმა, სერგო რატიანმა განაცხადა, რომელიც დედოფლისწყაროში, ზაზა კედელაშვილის ოფისზე განხორციელებულ თავდასხმას გამოეხმაურა.
რატიანის თქმით, „ნაციონალური მოძრაობის“ 63 ოფისზე თავდასხმა იყო და პრემიერ-მინისტრმა, ირაკლი ღარიბაშვილმა განაცხადა, რომ ის გამოხატვის თავისუფლებას დაიცავს.
„ის გამოხატვის თავისუფლებას დედოფლისწყაროშიც დაიცავს? რუს ბორისს მოკითხეთ, როგორ არის იარაღით ვაჭრობა და როგორ შეიძლება სამოქალაქო ომი გაღვივდეს?!“, - მიმართა უმრავლესობას რატიანმა.
შეგახსენებთ, წუხელ, დედოფლისწყაროში, ნაციონალი დეპუტატის ზაზა კედელაშვილის ოფისი დაცხრილეს.
