საქართველოს იუსტიციის მინისტრი თეა წულუკიანი აცხადებს, რომ ალეკო ელისაშვილის განცხადებებთან დაკავშირებით დაწყებულია გამოძიება და მას მოუწევს წარადგინოს ყველა მტკიცებულება. თბილისის საკრებულოს დეპუტატ ალეკო ელისაშვილის ბრალდება, რომელიც მაღალჩინოსნებს პატიმრების შეწყალებასთან დაკავშირებით კორუფციაში ადანაშაულებს წულუკიანის განცხადებით, მედიასაშუალებით მოისმინა.
"გამოძიება უკვე დაწყებულია და კორუფცია ამ ქვეყანაში ვერ დაბრუნდება. თუკი ვინმემ, ვინც არ უნდა იყოს ის, რამე დააშავა ამ სფეროში და კანონი დაარღვია, ეს არის სისხლის სამართლებრივი წესით დასჯადი. პროკურატურა ამ თემაზე მუშაობს და რა თქმა უნდა, ბატონ ელისაშვილს განცხადებების გარდა მოუწევს, ალბათ, ყველა ის მტკიცებულება, თუკი ასეთი გააჩნია, პროკურატურას მიაწოდოს, რომ გამოძიება სწორი მიმართულებით წავიდეს", - განაცხადა წულუკიანმა.
მისივე თქმით, იუსტიციის სამინისტრო არასდროს ყოფილა ჩართული ამნისტიის კანონზე მუშაობაში, არც პროექტის შემუშავებასა და არც იმ საქმეების განხილვაში, რომლებიც ამნისტიის კანონის მოქმედების ქვეშ უნდა მოხვედრილიყო.
ელისაშვილის ბრალდებებთან დაკავშირებით პროკურატურაში გუშინ ალეკო ელისაშვილი და შეწყალების კომისიის მოქმედი თავმჯდომარე ზვიად ქორიძე დაკითხეს.
