პარლამენტის ვიცე-სპიკერი გიორგი ბარამიძე დედოფლისწყაროში, დეპუტატ ზაზა კედელაშვილის ოფისის დაცხრილვის ფაქტზე რეაგირებას ითხოვს.
როგორც ბიუროს დღევანდელ სხდომაზე ბარამიძემ განაცხადა, წუხელ, დედოფლისწყაროში, კედელაშვილის ოფისი დაცხრილეს, რაც საღებავის სროლა აღარ არის.
მისი თქმით, საბედნიეროდ, ინციდენტის შედეგად, დაზარალებული არავინ არის.
„სამწუხაროდ, პოლიცია ერთი საათის დაგვიანებით მოვიდა. ეს საგანგაშო ინფორმაციაა, რომელიც რეაგირებას საჭიროებს. ყველაფერი გავაკეთოთ, რომ მავანმა და მავანმა ქვეყანაში მდგომარეობა იარაღისა და თოფის სროლისკენ არ წაიყვანოს. ამ სახიფათო სინდრომს, რომელიც მოქალაქეებს დაემართა, „ნაციონალური მოძრაობის“ მიმართ არასწორ პოლიტიკას ვუკავშირებ“, - განაცხადა ბარამიძე.
ბიუროს სხდომაზე ბარამიძეს პარლამენტის თავმჯდომარე დავით უსუფაშვილიც გამოეხმაურა.
სპიკრის თქმით, ამ ფაქტის შესწავლა უნდა მოხდეს.
„სამართალდამცავებს მივმართავ, რომ გამოძიება მოხდეს. სხვანაირადაც მივიღებთ ზომებს, რომ პარლამენტს ინფორმაცია უნდა ჰქონდეს. თოფის სროლა პარტიული ოფისიის წინააღმდეგ იქნება თუ სხვა პირის მიმართ, მძიმეა და ამას რეაგირება სჭირდება“, - დასძინა უსუფაშვილმა.
