უმრავლესობის წევრი თამარ კორძაია აცხადებს, რომ თუკი მოწმეთა დაკითხვის წესთან დაკავშირებით, იურიდიულ საკითხთა კომიტეტის შენიშვნები გაზიარებული არ იქნება, „რესპუბლიკელები“ ცვლილებებს მხარს არ დაუჭერენ.
როგორც ჟურნალისტებს კორძაიამ განუცხადა, ის დღევანდელ სხდომაზე ელოდება, რომ ინიციატორი შენიშვნებს გაიზიარებს.
მისი თქმით, კომიტეტის შენიშვნები გონივრულია.
„შენიშვნა ძირითადად ურთიერთსაწინააღმდეგო ჩვენების დროს მოწმის პასუხისმგებლობის საკითხს შეეხება. ჩვენთვის პრინციპულად მიუღებელია, თუ ურთიერთსაწინააღმდეგო ჩვენების არსებობის შემთხვევაში, მოწმე დაცვის მხარის დაუსწრებლად დაიკითხა, მისი პასუხისმგებლობის საკითხი დადგეს. ეს პრინციპული თემებია, რომელსაც წესით, სისხლის სამართლის კოდექსი უნდა გააუმჯობესოს. მოწმის დაკითხვისას სტანდარტი საკმაოდ დაბალია, რომელიც უნდა აიწიოს“, - დასძენს კორძაია.
პარლამენტი კანონპროექტს დღევანდელ რიგგარეშე სხდომაზე პირველი მოსმენით განიხილავს. ცვლილებები „სისხლის სამართლის საპროცესო კოდექსში“ შედის, რომლის მიხედვით, მოწმის გამოკითხვა გამომძიებლის მხრიდან ნებაყოფლობითი იქნება, მაგრამ თუ ის ინფორმაციის მიწოდებაზე უარს ამბობს და თუ გამომძიებელს, პროკურორს მიაჩნია, რომ მოწმე დანაშაულის გახსნისთვის მნიშვნელოვან ინფორმაციას ფლობს, მაშინ პროკურორს უფლება ექნება სასამართლოს მიმართოს და სასამართლოს თანხმობის შემთხვევაში, მოწმე მაგისტრატი მოსამართლის თანდასწრებით დაიკითხოს. ასეთ შემთხვევაში მოწმე ვალდებულია, სასამართლო სხდომაზე გამოცხადდეს.
ასევე, კანონპროექტით, სისხლის სამართლის გარკვეულ დანაშაულებზე მოწმეთა დაკითხვის ძველი წესი ნარჩუნდება და 2017 წლის 31 დეკემბრამდე ასეთი წესით მოწმეებს ისეთ დანაშაულებთან დაკავშირებით დაკითხავენ, რომელიც ეხება - განზრახ მკვლელობას, განზრახ მკვლელობას დამამძიმებელ გარემოებაში, თვითმკვლელობამდე მიყვანას, ჯანმრთელობის განზრახ მძიმე დაზიანებას, ოჯახში ძალადობას, ძარცვას, ყაჩაღობას, ტრანსპორტის მოძრაობის უსაფრთხოების ან ექსპლუატაციის წესის დარღვევას, შეთქმულებას ან ამბოხს კონსტიტუციური წყობილების ძალადობით შესაცვლელად, ტერორიზმთან დაკავშირებული დანაშაულებს.
