პარლამენტის თავმჯდომარე დავით უსუფაშვილი არ ფიქრობს, რომ სოსო ჯაჭვლიანის მიერ მომზადებული კანონპროექტი, რომელიც რელიგიური გრძნობების შეურაცხყოფისთვის ფულადი ჯარიმების დაწესებას ითვალისწინებს, ერთ კვირაში კანონად იქცევა.
დღეს გამართულ პრესკონფერენციაზე უსუფაშვილი „ადმინისტრაციულ სამართალდარღვევათა კოდექსში“ დაგეგმილ ცვლილებებს შეეხო და განაცხადა, რომ ის პარლამენტის წევრების კანონშემოქმედებით აქტივობას მიესალმება.
„ბოლო სამ თვეში, სოსო ჯაჭვლიანმა მესამე ინიციატივა შემოიტანა, რაც კარგია. ყველას ვთხოვ, რომ ასე იაქტიურონ. რაც შეეხება მხარდაჭერას, ამის თაობაზე მაშინ ვიმსჯელებთ, როცა კანონპროექტს ვნახავთ. რელიგიური გრძნობების არშეურაცხყოფა და რელიგიურ ნიადგაზე სიძულვილის არგაღვივება, მნიშვნელოვანია და ეს რა ტიპის ამოცანებით მიიღწევა, ამაზე კანონპროექტის განხილვის დროს ვიმსჯელებთ. ვისურვებდი, რომ კანონპროექტის დეტალებში ჩავიდეთ და თვალი იმან არ მოგვჭრას, რომ ეს რელიგიურ საკითხებს ეხება. გამოხატვის თავისუფლოება ძალიან ფუნდამეტური უფლებაა, მაგრამ ეს აბსოლიტური უფლება არ არის. ბატონი სოსოს ინიციატივასთან არანაირ ანალოგიას არ ვაკეთებ, მაგრამ არის ქვეყნები, სადაც რაღაც საკითხზე განსხვავებული მოსაზრების გამოთქმა, მაგალითად, გენოციდზე სისხლის სამართლის დანაშაულია. სერიოზული შეფასებითი კატეგორიებია - რელიგიური გრძნობა, მისი შეურაცხყოფა და რთულად დასადგენია ვინ რას მიიჩნევს შეურაცხყოფად. კანონპროექტის ინიცირების ფაქტიდან არ უნდა შევქმნათ წიაღსვლები“, - დასძინა უსუფაშვილმა.
საქართველოში შესაძლოა, რელოგიური გრძნობების შეურაცხყოფა დასჯადი ქმედება გახდეს და სამართალდამრღვევს ფულადი ჯარიმა დაეკისროს. ცვლილებებით, რელიგიური სიწმინდეების, რელიგიური ორგანიზაციის, ღვთისმსახურების და მორწმუნის მიმართ სიძულვილის საჯაროდ გამოხატვა ან/და ისეთი მასალის გამოქვეყნება ან ჩვენება, რაც მიზნად ისახავს მორწმუნეთა გრძნობების შეურაცხყოფას გამოიწვევს დაჯარიმებას - 300 ლარის ოდენობით. პროექტით, იგივე ქმედების განემროეებით ჩადენა გამოიწვევს - 600 ლარიან ჯარიმას. ამას გარდა, ცვლილებებით, რელიგიური შენობების და სხვა რელიგიური სიწმინდეების წაბილწვა, მასზე ნებისმიერი წარწერის გაკეთება, ან დაზიანება გამოიწვევს 500 ლარიან ჯარიმას, ხოლო იგივე ქმედების განმეორებით ჩადენა - 1000 ლარიან ჯარიმას.
