საქართველოს მართლმადიდებელი ეკლესიის წინამძღვრის ინიციატივას პატრიარქისთვის პატიმართა შეწყალების უფლების გადაცემის შესახებ მმართველ გუნდში აზრთა სხვადსხვაობაა. რესპუბლიკელები ცალსახად ამბობენ, რომ ასეთი საკონსტიტუციო ცვლილება მიღებული არ იქნება. ამის შესახებ განცხადება დღეს ლევან ბერძენიშვილმა გააკეთა.
„შეიძლება ძალიან ჰუმანური და კეთილი სურვილი იყოს, რომელსაც ასრულება არ უწერია, ვინაიდან კონსტიტუციური თვალსაზრისით სახელწმიფო ამ უფლებას ვერავის გადასცემს. ეს არის პრეზიდენტის უფლება და მისი შეთავსება ვინმეს არ შეუძლია. საკონსტიტუციო ცვლილებებზე მსჯელობა იქნება, მაგრამ ეს ცვლილებები ჩემი აზრით, არ იქნება,“ - აცხადებს ლევან ბერძენიშვილი.
ილია მეორეს ინიციატივაზე დღესვე კომენტარი გააკეთა უმრავლესობის კიდევ ერთმა წევრმა ელისო ჩაფიძემ და განაცხადა, რომ პარლამენტი იმსჯელებს შეწყალების პროცესში ინსტიტუციურად პატრიარქის როლის გაზრდაზე. დეპუტატი არ გამორიცხავს, რომ ჩატარდება გარკვეული გამოკითხვა საზოგადოებაში და ამის მიხედვით მოხდება გადაწყვეტილების მიღება.
