პარლამენტის თავდაცვის კომიტეტის თავმჯდომარე ირაკლი სესიაშვილი წინადადებით გამოდის, რომ მარჯვენასაჭიანი ავტომობილების შესყიდვა დაშვებული იმ შემთხვევაში იქნეს, თუკი მისი მარცხენასაჭიან მანქანად გადაკეთება უსაფრთხოების ნორმების დაცვით მოხდება.
როგორც „ჯი-ეიჩ-ენ“-ს სესიაშვილმა განუცხადა, ის მარჯვენასაჭიანი ავტომობილების რეგისტრაციის აკრძალვას მიესალმება.
მისი თქმით, მარჯვენასაჭიანი ავტომობილების მძღოლების უსაფრთხოება ადეკვატურად უზრუნველყოფილი არ არის და საფრთხის შემცველია.
„მძღოლი ვარ და რამდენჯერმე ისეთი შემთხვევა იყო, როცა ჩემს წინ მარჯვენასაჭიანი მანქანით მძღოლი მიდიოდა, რომელიც გასწრების მომენტში, მარცხენა მხარეს გადავიდა და გახედვისას, მილიმეტრებში სიკვდილს გადაურჩა. ეს საკითხი რეგულირებას ნამდვილად საჭიროებს. უნდა გავაანალიზოთ, რომ უსაფრთხოების ზომების დაცვა საჭიროა. იმაზეც უნდა ვიფიქროთ, ეს ჩვენს ქვეყანაზე ეკონომიკურად რა გავლენას მოახდენს. იაპონური მანქანები, რომელიც შემოჰყავთ, იაფფასიანია, მაგრამ რომელიმეს ხარისხით არ ჩამოუვარდება. თუკი საჭის გადატანა უსაფრთხოების ზომების შესაბამისად შესაძლებელია, მაშინ მხარს დავუჭერდი იმას, რომ მარჯვენასაჭიანებმა საჭე მარცხნივ გადაიტანონ და ასეთი ავტომობილების შესყიდვა შეიძლებოდეს“, - განაცხადა სესიაშვილმა.
შს მინისტრი გიორგი მღებრიშვილი იდეით გამოვიდა, რომ მარჯვენასაჭიანი ავტომობილების რეგისტრაცია აიკრძალოს.
