ეკონომიკის მინისტრი დიმიტრი ქუმსიშვილი იმედოვნებს, რომ მარჯვენასაჭიანი ავტომანქანების რეგისტრაციის აკრძალვა ფასების ცვლიებას არ გამოიწვევს. „საგზაო ტრანსპორტის პოლიტიკისა და უსაფრთხო საგზაო მოძრაობის შესახებ კანონში“ შესატან ცვლილებებთან დაკავშირებით მან განაცხადა, რომ მთავარი საზრუნავი მოქალაქეების ჯანმრთელობაა.
„პირველ რიგში, ჩვენი საზრუნავი ჩვენი მოქალაქე და მისი ჯანმრთელობაა. როდესაც მარჯვენასაჭიან ავტომობილებზე ვსაუბრობთ, პირველი სტიმული, რაც გადაწყვეტილების მიღების შემთხვევაში გვაქვს, ჩვენი მოქალაქეების უსაფრთხო გადაადგილებაა. ეს ამოსავალი წერტილია. ამოსავალი წერტილი, ასევე, ის ეკოლოგიური მდგომარეობაა, რომელიც გვაქვს“, - განაცხადა დიმიტრი ქუმსიშვილმა.
მისივე თქმით, ბაზარზე ხელმისაწვდომი ავტომობილები არსებობს და იარსებებს კიდეც.
„დღეის მდგომარეობით, რასაც საავტომობილო ბაზარზე ვხედავთ, ფასები ძალიან შემცირებულია. არის ხელმისაწვდომი ავტომობილები და ვიმედოვნებთ, რომ მომავალშიც ასე გაგრძელდება“, - აღნიშნა ქუმსიშვილმა.
შეგახსენებთ, შსს მინისტრმა დღეს განმართა, რომ ვისაც მარჯვენასაჭიანი ავტომანქანები უკვე დარეგისტრირებული აქვს, მათ ცვლილებები არ შეეხებათ. კონკრეტული თარიღის შემდეგ კი, მსგავსი მანქანების რეგისტრაცია აიკრძალება.
