უზენაესი სასამართლოს თავმჯდომარის ნინო გვენეტაძის განცხადებით, სულ სასამართლოების სისტემაში 61 ვაკანტური ადგილია. მისი თქმით, იუსტიციის უმაღლეს საბჭოში საქალაქო და სააპელაციო სასამართლოების მოსამართლეობის კანდიდატურების გასაუბრება მიმდინარეობს.
"პირველი ეტაპი უკვე გავლილია. ეს არის დოკუმენტაციის შეგროვება, რომელიც კონკრეტულმა კანდიდატურებმა წარმოადგინეს და ასევე რაც იუსტიციის უმაღლეს საბჭოს ჰქონდა მათ შესახებ. დღეს იწყება მეორე ეტაპი. საბჭოს წევრების მიერ კონკრეტული კანდიდატი გამოიკითხება კეთილსინდისიერების, კვალიფიკაციის, პროფესიონალიზმის და ყველა იმ სტანდარტის გათვალისწინებით, რომლის საფუძველზეც უნდა მოხდეს კენჭისყრა”- განაცხადა გვენეტაძემ და დასძინა, რომ ყველა პროცედურა იქნება ძალიან გამჭვირვალე.
