საქართველოს იუსტიციის სამინისტროს მონაცემთა გაცვლის სააგენტოს ხარისხის მართვის (ISO 9001:2008) შესაბამისობის საერთაშორისო სერტიფიკატი მიენიჭა.
სამინისტროს ინფორმაციით, მონაცემთა გაცვლის სააგენტოდან აცნობეს, სერტიფიცირების საერთაშორისო ასოციაცია "IQnet"-მა ჩატარებული აუდიტის შედეგად დაადგინა, რომ მონაცემთა გაცვლის სააგენტოში არსებული პრაქტიკა, რომელიც ეხება თანამედროვე ინფორმაციულ-საკომუნიკაციო სისტემების განვითარებას, ელექტრონული მმართველობის პრინციპებზე დაფუძნებული ინტეგრირებული სისტემების ჩამოყალიბებას, ელექტრონული სერვისების განვითარებასა და დოკუმენტბრუნვის ელექტრონული პლატფორმების გამართვას, სრულ შესაბამისობაშია ხარისხის მართვის საერთაშორისო სტანდარტთან.
აღნიშნული გადაწყვეტილებით იზრდება მონაცემთა გაცვლის სააგენტოს საერთაშორისო რეიტინგი და შესაბამისად, ამავე სააგენტოს მიერ შექმნილი სერვისებისადმი ნდობის ხარისხი, რაც იძლევა გარანტიას, რომ მოქალაქე ან ბიზნეს სუბიექტი იღებს საერთაშორისოდ აღიარებული სტანდარტების მომსახურებას.
"IQnet"-ის სერტიფიკატი ჩვენთვის ძალიან მნიშვნელოვანია. მის მიერ აკრედიტებულმა ორგანიზაციამ მონაცემთა გაცვლის სააგენტოში ჩაატარა დეტალური აუდიტი, თუ როგორ ვუდგებით ჩვენ ხარისხის მართვას, რა კრიტერიუმებით ვხელმძღვანელობთ ახალი ელექტრონული სერვისების შექმნისა და მათი მომხმარებლამდე მიტანის პროცესში და მოგვანიჭა ISO 9001:2008 შესაბამისობის სერტიფიკატი, რაც ჩვენი ორგანიზაციის, როგორც საერთაშორისო სტანდარტების შესაბამისად მოქმედი სუბიექტის აღიარებას ნიშნავს", - განაცხადა იუსტიციის სამინისტროს მონაცემთა გაცვლის სააგენტოს თავმჯდომარემ ირაკლი გვენეტაძემ.
