ეს არის არჩევნები, რომელშიც ყველამ გავიმარჯვეთ და არ არსებობს დამარცხებული,- ასე შეაფასა საქართველოს მთავარმა პროკურორმა, გიორგი ბადაშვილმა საპროკურორო საბჭოს რვა წევრის არჩევა.
"მინდა, მივულოცო არჩეულ საპროკურო საბჭოს წევრებს საქართველოს პროკურატურის ისტორიაში პირველ არჩევნებში მონაწილეობა და კოლეგების ნდობის და მანდატის მოპოვება, მაგრამ ეს არის არჩევნები, რომელშიც ჩვენ ყველამ გავიმარჯვეთ. აქ არ არსებობს დამარცხებული", - აღნიშნა მთავარმა პროკურორმა.
მისივე თქმით, საქართველოს პროკურატურა არის ყველაზე ორგანიზებული და ერთიანი სულისკვეთებით განმსჭვალული ორგანიზაცია.
"პირველ რიგში მინდა, გამოვხატო ჩემი ღრმა პატივისცემა თითოეული პროკურორის, გამომძიებლის, იმ თანამშრომლის მიმართ, რომელმაც ამ სამი დღის განმავლობაში მუხლჩაუხრელად იშრომა და მოგვცა საშუალება, ძალიან მაღალ დონეზე, ძალიან ორგანიზებულად ჩაგვეტარებინა საქართველოს პროკურატურის ისტორიაში პირველი პროკურორთა კონფრენცია. ჩვენ კიდევ ერთხელ დავამტკიცეთ, რომ საქართველოს პროკურატურა არის ყველაზე ორგანიზებული და ერთიანი სულისკვეთებით განმსჭვალული ორგანიზაცია. ეს არის თითოეული თქვენგანის დამსახურება და ამისთვის მადლობა მინდა გადაგიხადოთ", - განაცხადა ბადაშვილმა.
შეგახსენებთ, საპროკურორო საბჭოს წევრები არიან: გიგა ძნელაძე, ნათია სონღულაშვილი, გოჩა ფარულავა, კონსტანტინე სირაძე, ანა კალანდაძე, გიორგი გაბოძე, ანზორ რუსტიაძე და მამუკა ფიფია.
