იუსტიციის მინისტრის თეა წულუკიანი აცხადებს, რომ კარგი იქნება, თუკი უკრაინაში მყოფი "ნაციონალური მოძრაობის" წარმომადგენლებიც მოიკვლევენ, თუ როგორ მოხვდა წამების კადრები ადგილობრივ მედიაში. მისივე თქმით, ამ კადრების საჯაროდ ჩვენება მიუღებელია.
,,ვგმობ იმას, რომ ბავშვებმა, არასრულწლოვნებმა, ან იმ ადამიანებმა, ვისაც არ აურჩევია უყუროს ამ კადრებს, ეს კადრები თავისით ეცეს მათ თვალში. ეს რა თქმა უნდა, არის ძალიან ცუდი.
რაც შეეხება თვითონ კადრების არსებობას, ეს კადრები არის ნაწილი სისხლის სამართლის პროცესის. ხაზგასმით მინდა ვთქვა, რომ კასრების საქმეზე 11 პირია დამნაშავედ ცნობილი, არაერთი მათგანი დღეს იხდის სასჯელს, 2 მათგანი - მეგის ქარდავა და კოხტა კოდუა არიან საერთაშორისო ძებნაზე. ერთი პირი, რომელიც იყო საერთაშორისო ძებნაზე, პროკურატურამ უკვე ექსტრადიციის გზით ჩამოიყვანა და დღეს ის ზის ქართულ ციხეში და იხდის ამ უმსგავსო საქციელისთვის, ამ უმძიმესი დანაშაულისთვის სასჯელს", -განაცხადა თეა წულუკიანმა.
მისივე თქმით ამ კადრების განადგურება არის სეუძლებელი, რადგან არის როგორც სისხლის სამართლებრივი პროცესის ნაწილია, ასევე ,,არის ჩვენი წარსულის ნაწილი".
"ისინი უნდა იქნეს შემონახული, მაგრამ მისი გავრცელების წესი ყველამ უნდა დაიცვას. ეს იქნება როცა გავა ძალიან ბევრი წელი, ისტორიული მტკიცებულება იმისა, თუ ვინ გვმართავდა 9 წლის განმავლობაში ამ ქვეყანაში. მაგრამ, მოდი, დავიცვათ ჩვენი ბავშვები, დავიცვათ ის ადამიანები, ვინც ამ კადრების შემყურე გუშინ იყვნენ მორალურ შოკში, დავიცვათ ისინი და ადამიანებს მივცეთ არჩევანის თავისუფლება – ვისაც სურს ნახავს ამ კადრებს, ვისაც არ სურს არ ნახავს", - განაცხადა თეა წულუკიანმა.
რაც შეეხება კადრების გავრცელებას, მინისტრის განცახდებით, გამოძიება დაიწყო საქართველოს შინაგან საქმეთა სამინისტროში.
