იუსტიციის უმაღლესი საბჭოს სხდომაზე თავმჯდომარე უზენაესი სასამართლოს თავმჯდომარეს, ნინო გვენეტაძეს საბჭოს მდივანი ლევან მურუსიძე და საბჭოს წევრი ლევან თევზაძე დაუპირისპირდნენ. მურუსიძის თქმით, საერთო სასამართლოების შესახებ ორგანულ კანონში ცვლილებები გვენეტაძემ იმ სახით არ წარადგინა, რაზეც იყვნენ შეთანხმებული.
საბჭოს მდივანი აცხადებს, რომ ეს ეხება სადისციპლინო კოლეგიაში იუსტიციის უმაღლესი საბჭოს წევრთა ხმათა რაოდენობაში ცვლილებებს, დისციპლინური სამართალწარმოების პროცესში ინსპექტორის ჩართვას და მენეჯმენტურ საკითხებს.
ლევან თევზაძემ კი ნინო გვენეტაძეს უთხრა, რომ როდესაც რაიმე პოზიციას აფიქსირებს, თუ ეს არ არის ყველასთან შეთანხმებული, ნუ ისაუბრებს ყველა მოსამართლის სახელით.
გვენეტაძის განცხადებით, მან ყველა შეთანხმებული საკითხი მიაწოდა იუსტიციის სამინისტროს, თუმცა გადაწყვეტილებას იღებს არა ის, არამედ ინიციატორი - იუსტიციის სამინისტრო.
სხდომაზე გვენეტაძემ მურუსიძეს კონსტრუქციულობისკენ მოუწოდა.
