იუსტიციის მინისტრის მოადგილე, გოჩა ლორთქიფანიძე სოციალური საწარმოების გახსნას დაესწრო. უწყების ინფორმაციით, საქართველოში დაბრუნებულ ნარკოდამოკიდებულ მიგრანტებს შრომით სარეაბილიტაციო პროგრამაში ჩართვის შესაძლებლობა ექნებათ. ამ მიზნით მიგრაციის საერთაშორისო ორგანიზაციამ ექვსი სოციალური საწარმო გახსნა.
ღონისძიებას იუსტიციის მინისტრის მოადგილე გოჩა ლორთქიფანიძე ესწრებოდა. ექვსი სოციალური საწარმოდან ორი იუსტიციის სამინისტროს "დანაშაულის პრევენციის ცენტრის" ფარგლებში იმუშავებს.
იუსტიციის მინისტრის მოადგილემ ადამიანის უფლებების დაცვის კუთხით გატარებულ რეფორმებზე და ანტიდისკრიმინაციული კანონის შესახებ ისაუბრა, რომელიც დისკრიმინაციის ყველა ფორმის აღმოფხვრას უწყობს ხელს.
"თითოეული ცვლილება, რომელიც შემოგვაქვს, ადამიანის უფლებების ფუნდამენტურ უფლებებს ეფუძნება. სახელმწიფო მიდგომა შეცვლილია, რეპრესიული ნარკოპოლიტიკა თანმიმდევრულად მიდის დაბალანსებული ნარკოპოლიტიკისკენ; ახლად დაარსებული სოციალური საწარმოები კი შექმნიან დასაქმების შესაძლებლობას 100-ზე მეტი ყოფილი ნარკომომხმარებლისთვის საქართველოში და ეს უეჭველად ყველაზე ეფექტური გზაა რეაბილიტაციისა და მეორადი პრევენციისათვის", − განაცხადა გოჩა ლორთქიფანიძემ.
სამინისტროს განცხადებით, სოციალური საწარმოები ყოფილ ნარკომომხმარებლებს სთავაზობენ შრომითი სარეაბილიტაციო პროგრამის შესაძლებლობას, რითაც მათ სოციალურ ინტეგრაციას, პროექტში მონაწილეთა ცხოვრების წესში პოზიტიურ ცვლილებას, მათი დასაქმებისა და პროფესიული უნარების განვითარებას ხელი შეეწყობა. მთლიანობაში, პროგრამაში 5 ორგანიზაცია მონაწილეობს. კერძოდ, იუსტიციის სამინისტროს სსიპ "დანაშაულის პრევენციის ცენტრი"; პრობაციის ეროვნული სააგენტოს შპს "პერსპექტივა"; გორის მუნიციპალიტეტის სანერგე მეურნეობა; ა(ა)იპ "კამარა" და საინფორმაციო სამედიცინო-ფსიქოლოგიური ცენტრი "თანადგომა".
სამინისტროს ინფორმაციით, მიგრაციის საერთაშორისო ორგანიზაციის სოციალური საწარმოების პროგრამის მხარდამჭერი მიგრაციის საკითხებში შვეიცარიის სახელმწიფო სამდივნოა. აღნიშნული პროგრამა ქვეყანაში სპეციალური საჭიროების მქონე ნარკომომხმარებელი მიგრანტი მოსახლეობისთვის გრძელვადიან სარეაბილიტაციო სერვისებს დანერგავს ითვალისწინებს.
