სასამართლოს ეზოში შეკრებილმა „ნაციონალური მოძრაობის“ წევრებმა სპეციალური განცხადება გააკეთეს. მათ მოუწოდეს უგულავას მხარდამჭერებს, რომ განაჩენის გამოცხადებამდე დარჩნენ სასამართლოში და შემდეგ გადაწყვეტენ, როგორ იმოქმედონ.
პარტიის საერთაშორისო მდივნის გიგა ბოკერიას განცხადებით, ბიძინა ივანიშვილის მმართველობა მშვიდობიანი გზით უნდა დამთავრდეს.
,,გუშინდელი დღის შემდეგ, გაასმაგებულია ზეწოლაა მოსამართლეზე, რომელსაც ავარია მოუვიდა და ის გამოჭერილი ყავთ. გუშინ მოვიპოვეთ გამარჯვება და საკონსტიტუციო სასამართლოს გადაწყვეტილებით შეიქმნა პრეცედენტი, რომ ვერავის დააკავებენ უსასრულოდ ციხეში.
ის, რაც დღეს აქ მოხდება, ჩვენთვის არაფერს ცვლის. გიგიმ იცოდა, რომ არ დაუშვებდა ივანიშვილი მის თავისუფლებაში დატოვებას. ივანიშვილი თავის მიზანს ვერ მიაღწევს. დღეს, როცა გამოცხადდება გადაწყვეტილება, ჩვენ ყველანი მივმართავთ მას, ვინც სამი წელი ქვეყანა ჩიხში შეიყვანა, მისი მმართველობა მშვიდობიანი გზით დასრულდება. ჩვენი მოთმინება ამოწურულია. ჩვენ მოქმედებას ვიწყებთ დღეიდან, როცა გადაწყვეტილება გამოცხადდება, გადავწყვეტთ, თუ როგორ ვიმოქმედებთ“, - განაცხადა ბოკერიამ.
რიყისა და „თბილსერვისჯგუფის“ საქმეზე ბრალდებულ გიგი უგულავას და დავით კეზერაშვილის საქმეზე, მოსამართლე ლაშა ჩხიკვაძე გადაწყვეტილებას მისაღებად სათათბიროდ არის გასული.
