გიგი უგულავამ საბოლოო სიტყვის წარმოთქმაზე უარი განაცხადა. მისი თქმით, მოსამართლეებს ეჩქარებათ განაჩენის გამოტანა, რაშიც ხელს არ შეუშლის.
"ეს საქმე დამთავრდება ბრალდებულის საბოლოო სიტყვის გარეშე. ჩემი თავმოყვარეობა არ მაძლევს უფლებას, რომ ფორმალურად ვთქვა საბოლოო სიტყვა. არც დროის გაწელვას ვაპირებ. შემეძლო, აცილებები მომეთხოვა და სხვადასხვა საპროცესო ნორმა გამომეყენებინა, სხდომა 18:00 საათამდე, ანუ სამუშაო დროის ამოწურვამდე გამეწელა, მაგრამ ამას არ გავაკეთებ. რა გადაწყვეტილებაც გინდა ის მიიღეთ", - განაცხადა უგულავამ.
მისი თქმით, თუ ვინმეს აქვს განცდა, რომ მას ეშინია, ასე არ არის. ამასთან, უგულავამ მოსამართლეს მიმართა, რომ საბოლოო სიტყვის მოსამზადებლად ერთკვირიანი ვადის განსაზღვრის შუამდგომლობის დაუკმაყოფილებლობით არასწორი და არაადამიანური გადაწყვეტილება მიიღო.
რიყის ტერიტორიისა და "ტელეიმედის" გასხვისების თაობაზე დავით კეზერაშვილისა და გიგი უგულავას წინააღმდეგ საქმეზე მოსამართლე ლაშა ჩხიკვაძე სათათბიროდ გავიდა. მას არ დაუკონკრეტებია რამდენ ხანში გამოაცხადებს განაჩენს.
