თბილისის საქალაქო სასამართლომ დედაქალაქის ყოფილი მერის გიგი უგულავას ბრალდების მხარის შუამდგომლობები არ დააკმაყოფილა და იგი გაათავისუფლა.
სასამართლო სხდომას ესწრებოდა ყოფილი პრემიერ-მინისტრი ვანო მერბიშვილიც. ვანო მერაბიშვილმა სასამართლო ხმამაღალი შეძახილების ფონზე პროტესტის ნიშნად დატოვა. მერაბიშვილის გაღიზიანება გამოიწვია პროკურორ ჯარჯი წიკლაურის შუამდგომლობამ, რომელმაც აღნიშნა, რომ მათ საკონსტიტუციო სასამართლოს სარეზოლუციო ნაწილის გასაცნობად დრო სჭირდებათ.
"ტელევიზორი არ გაქვთ?! არ გრცხვენიათ?!", - რამდენჯერმე მიმართა მერაბიშვილმა პროკურორებს და მოსამართლის შენიშვნის შემდეგ სხდომა დატოვა.
მანამდე კი სხდომაზე ვანო მერაბიშვილმა განაცხადა, რომ დღეს მოსამართლეები არნახული ზეწოლის ქვეშ არიან, თუმცა უნდა გაუძლონ, რადგან დღეები და თვეებია დარჩენილი.
„დღეს გიგი თუ არ გათავისუფლა ეს იქნება სრულიად არნახული ფაქტი, ვერ ცერთი მოსამართლე ვერ შეძლებს სხვა გადაწყვეტილების მიღებას, ნებისმიერი სასამართლოს მხრიდან მცდელობა, რომ აცილება მისცეს თავის თავს, გადადოს ეს იქნება ამ სამარცხვინო ადამიანების თავის დახრა, რაც არ ეკადრება. დღეს ჩვენ გვაქვს უნიკალური შემთხვევა, როდესაც საკონსტიტუციო სასამრთლომ მისცა მაგალითი ქართულ სასამართლოს, რომელიც წლების განმავლობაში შერცხვენილია, მისცა შანსი, რომ დაამტკიცოს საქართველოში არის ინსტიტუტი სასამართლო, რომელსაც შეუძლია წინააღმდეგობა გაუწიოს ამ უსუსურ უნიათო წარსულის აჩრდილებს. მოსამართლეებს მინდა მივმართო, თქვენზე ვიცი, რომ ზეწოლა ხორციელდება, მალე ეს შავბნელი პერიოდი ისტორიას ჩაბარდება,“-განაცხადა ვანო მერაბიშვილმა და დასძინა, - "კორუმპირებული, მექრთამე და გათახსირებული ტურავას პირობებში, საკონსტიტუციო სასამართლომ გააუქმა ნორმა, რის საფუძველზეც უგულავა უნდა გათავისუფლდეს. გარანტიას ვაძლევ, პასუხს აგებენ ქართული კანონმდებლობის წინაშე. განსაკუთრრბით პროკურორი წიკლაური, რომლის კისერზე ამ ახალ ცოდვებთან ერთად, სასჯელაღსრულების დეპარტამენტის ზედამხედველად მუშაობისას უამრავი ცოდვაა. თუ ვინმემ პასუხი უნდა აგოს, ეს წიკლაურია".
პროცესზე გიგი უგულავამ სასამართლო გააკრიტიკა.
"პოზიცია არის ის, რომ სასამართლო არის არასწორი გზით წასული. 48 საათი რომ ამოიწურება პირი თავისუფლდება. იგივე ხდება 72 საათშიც და 9 თვის შემთხვევაშიც. მესმის, რომ ეს სამართლებრივად კაზუსია, რაც პროცესის პოლიტიკურმა შემადგენლობამ განაპირობა. მოლოდინს გადააჭარბა პროკურატურის ქმედებებმა, მაგრამ ეს ჯერ ჟურნალია. უკადრებელს ან საკადრებელს იკადრებენ, რომ დრო გაწელონ. დარწმუნებული ვარ ყველაფერს მოითხოვენ. საერთო სასამართლოებს ჩემი აზრით საერთოდ არ უნდა განეხილათ უკვე მიღებული გადაწყვეტილება. ეს დამატებითი ბიუროკრატიაა და ცუდი პეცენდენტი, რადგან მომავალში იქნება პრაქტიკა, რომ მსგავსი შემთხვევები განმეორდეს. კიდევ ერთხელო ვიტყვი, რომ ვფიქრობ, რომ აღნიშნული საკითხი სასამართლოებს არ უნდა განეხილათ. დღევანდელი ჩვენი მსჯელობით რას შევცვლით, გადაწყვეტილებას? აქვე ვიტყვი, რომ ეს ყველაფერი ჩრდილს აყენებს სამართალწარმოებას და თითოეულ თქვენთაგანს,"- განაცხადა უგულავამ.
შეგახსენებთ, რომ დღეს საქალაქო სასამართლოს გიგი უგულავას ადვოკატებმა მიმართეს, განეხილათ საკონსტიტუციო კომისიის გადაწყვეტილება, რომელმაც გიგი უგულავას სარჩელი ნაწილობრივ დააკმაყოფილა.
შესაბამისი გადაწყვეტილება საქართველოს საკონსტიტუციო სასამართლოს თავმჯდომარემ, გიორგი პაპუაშვილმა გუშინ, 21.00 საათზე გამოაცხადა.
