საქართველოს პრეზიდენტის განცხადებით, საკოსტიტუციო სასამართლოს გუშინდელი გადაწყვეტილება დაუყოვნებლივ უნდა აღსრულდეს საერთო სასამართლოების მიერ. გიგი უგულავას საკონსტიტუციო სარჩელთან დაკავშირებით სასამართლოს გადაწყვეტილებაზე, პრეზიდენტმა საგანგებო ბრიფინგი გამართა.
"სახელმწიფოს უმთავრესი დანიშნულებაა ადამიანის უზენაესი უფლებების დაცვა. მართლმსაჯულების მიზანიც სწორედ ამ უზენაეს უფლებათა უზრუნელყოფაშია. საკონსტიტუციო და საერთო სასამართლოები უნდა იდგნენ ამ უფლებათა სადარაჯოზე. საკონსტიტუციო სასამართლოს გადაწყვეტილება არის საბოლოო და სავალდებულოა შესასრულებლად, შესაბამისად, საკოსტიტუციო სასამართლოს გუშინდელი გადაწყვეტილება დაუყოვებლივ უნდა აღსრულდეს საერთო სასამართლოების მიერ. ჩვენ ყურადღებით ვადევნებთ თვალ-ყურს ამ გადაწყვეტილების ყველა კონკრეტულ შემთხვევაში აღსრულების პროცესს" - განაცხადა პრეზიდენტმა.
გიგი უგულავას პატიმრობიდან გათავისუფლებასთან დაკავშირებულ შუამდგომლობაზე, სხდომა თბილისის საქალაქო სასამართლოში დღეს, 17:00 საათზე ჩაინიშნა.
დედაქალაქის ყოფილი მერის ადვოკატმა ბექა ბასილაიამ განაცხადა, რომ მის მიერ დაყენებულ შუამდგომლობას სასამართლო კოლეგია განიხილავს.
ბექა ბასილაიამ დააყენა შუამდგომლობა, რომ ტელეკომპანია „იმედის“ საქმეზე პროცესი გადაიდოს,
რადგან მას მოსამართლის თანაშემწემ დაურეკა და ტექნიკური საკითხების მოგვარება სთხოვა.
საკონსტიტუციო სასამართლომ გიგი უგულავას სარჩელი ნაწილობრივ დააკმაყოფილა.
საქმე ეხება პატიმრობაში მყოფი გიგი უგულავას მიერ საქართველოს პარლამენტის წინააღმდეგ შეტანილ სარჩელს, სადაც უგულავა პარლამენტს არაკონსტიტუციური კანონის მიღებაში ადანაშაულებს.
