საკონსტიტუციო სასამართლოს გადაწყვეტილების საფუძველზე გიორგი ოქროპირიძე უკანონო პატიმარია. ლაშა მახარაძის მკვლელობისთვის ბრალდებულის ოჯახის წევრები დაკავებულის გათავისუფლებას ითხოვენ. როგორც გიორგი ოქროპირიძის დედა აცხადებს, საკონსტიტუციო სასამართლოს მიერ გიგი უგულავას სარჩელთან დაკავშირებული გადაწყვეტილების შემდეგ ოქროპირიძეც უნდა გათავისუფლდეს, რადგანაც მიღებული გადაწყვეტილება ოქროპირიძესთან მიმართებით მოქმედებს ზუსტად ისე, როგორც გიგი უგულავსთან დაკავშირებით. გიორგი ოქროპირიძე ლაშა მახარაძის მკვლელობის საქმეზე ბრალდებულად გასული წლის სექტემბერში ცნეს. მის საქმეს ნაფიცი მსაჯულები განიხილავდნენ, თუმცა ვერდიქტი ვერ გამოიტანეს. განხილვების ბოლოს ოქროპირიძეს პატიმრობის 9-თვიანი ვადა ამოეწურა. ვადის ამოწურვამდე მას ახალი ბრალი წარედგინა ცრუ დასმენისა და ცრუ ჩვენების შესაბამისი მუხლებით. საქმეზე ნაფიცი მსაჯულების ხელახალი შერჩევა მიმდინარეობს.
