კონსტიტუციური სამართლის სპეციალისტი ვახუშტი მენაბდე საკონსტიტუციო სასამართლოს მიერ დედაქალაქის ყოფილი მერის გიგი უგულავას საქმეზე გადაწყვეტილების გამოცხადების გადადებას ეხმიანება. იგი მიიჩნევს, რომ სასამართლოსთვის ძალიან რთული იქნება იმის დასაბუთება, რომ პროცესი მერაბ ტურავას ავადმყოფობის გამო გადაიდო.
,,საკონსტიტუციო სასამართლოში გიგი უგულავას საქმის გამოცხადება გადაიდო მოსამართლე მერაბ ტურავას ავადმყოფობის გამო. ეს ამბავი ბევრ კითხვას აჩენს, რომელსაც პასუხები სჭირდება. სასამართლოსთვის ძალიან რთული იქნება ამ უხერხული სიტუაციიდან გამოსვლა. საზოგადოების წინაშე დამაჯერებლად დასაბუთება რომ ეს მიზეზი რეალობას შეესაბამება”, _აცხადებს მენაბდე.
მოსამართლე მერაბ ტურავას ავადმყოფობის გამო, საკონსტიტუციო სასამართლომ უგულავას საქმეზე გადაწყვეტილება ვერ გამოაცხადა.
თბილისის ყოფილი მერის, გიგი უგულავას სარჩელზე, პატიმრობის 9 თვიან ვადასთან დაკავშირებით, საქართველოს საკონსტიტუციო სასამართლოს გადაწყვეტილება დღეს, 17:00 საათზე უნდა გამოეცხადებინა. თუმცა, ერთი საათის დაგვინებით გახდა ცნობილი, რომ მოსამართლის არყოფნის გამო, გადაწყვეტილება ვერ გამოცხადდებოდა.
