თელავი-გურჯაანის მაგისტრალზე მიმდინარე აქციაზე სამართალდამცავებმა გლეხები პოლიციელის კანონიერი მოთხოვნისადმი დაუმორჩილებლობის გამო დააკავეს. Aამის შესახებ ,,ჯი-ეიჩ-ენს” შსს-ში საკითხის კომენტირებისას განუცხადეს.
შსს-ს ინფორმაციით დაკავებულია ორი პირი.
,,დაკავებულია ორი პირი. გამოძიება ადმინისტრაციული სამართალდარღვევის კოდექსის 173-ე მუხლით მიმდინარეობს, რაც პოლიციელის კანონიერი მოთხოვნისადმი დაუმორჩილებლობას გულისხმობს”, _აცხადებენ საგამოძიებო უწყებაში.
შეგახსენებთ, რომ თელავი-გურჯაანის მაგისტრალზე მიმდინარე აქციაზე მევენახეებსა და პოლიციელებს შორის ფიზიკური დაპირისპირება მოხდა.
შედეგად სამართლდამცველებმა ორი პირი დააკავეს, ასევე ნაცემია აქციის რამდენიმე მონაწილეც.
გლეხები განსაკუთრებულ უხეშობაში პოლიციელ გიორგი ნასყიდაშვილს ადანაშაულებენ. შემთხვევის ადგილზე პოლიციის სამმართველოს უფროსის მოადგილე გიორგი კლიმიაშვილიც იმყოფებოდა.
აქციის მონაწილეები სოფლის მეურნეობის მინისტრის, ოთარ დანელიას გუშინდელ განცხადებას აპროტესტებენ, რომლის მიხედვითაც, ყურძნის არსებული ფასით გლეხი 100-პროცენტიან მოგებას იღებს. ისინი მინისტრის ადგილზე ჩასვლას და გუშინდელ განცხადებაზე განმარტებას ითხოვენ.
ამ დროისთვის თეთრი ყურძნის ფასი 60, ხოლო საფერავის 85 თეთრია. აქციის მონაწილეები კახეთში ოთარ დანელიას ჩასვლას ითხოვენ. გურჯაანის გლეხების პროტესტს ლაგოდეხელი მევენახეებიც შეუერთდნენ
