,,გია არდაზიშვილი იყო რიგითი თანამშრომელი, რომელიც მუშაობდა ღია წყაროებზე, აკეთებდა ანალიზს და აწვდიდა ხელმძღვანელობას “- განაცხადა სახელმწიფო უსაფრთხოების სამსახურის უფროსმა ვახტანგ გომელაურმა თემის კომენტირებისას.
მისი თქმით, არდაზიშვილი დაკავებულია და მას რამდენიმე მუხლით აქვს ბრალი წაყენებული
,,მას არანარი წვდომა არ ჰქონდა საიდუმლო ინფორმაციაზე. იმ დროისთვის გამოძიება დაწყებული იყო და მიმდინარეობდა მისი დაკავების ოპერაცია, აქედან გამომდინარე, ჩვენ ვერანაირ განცხადებას ვერ გავაკეთებდით და გიორგი ბარამიძე კარგად მიხვდა, მე რომ ავუხსენი, ის იყო შს მინისტრი და მან გაიგო, მე რაზე ვსაუბრობდი. არ შეიძლებოდა ამ განცხადების გაკეთება, რომ ჩვენი სპეცსამსახურის თანამშრომელმა მიატოვა და გადავიდა სხვა ქვეყანაში. მინდა ხაზი გავუსვა, განცხადებები გაკეთდა მათი მხრიდან, თითქოსდა ის არა ჩვენ, არამედ რუსულმა სპეცსამსახურებმა, ოსურმა სპეცსამსახურებმა სცემეს, დააკავეს და გადმოაგდეს ე.წ. საოკუპაციო ზოლზე. როგორ წარმოგიდგენიათ თქვენ, რომ ადამიანი გადავიდეს, გადაუტანოს ღირებული ინფორმაცია და ის ადამიანი სცემონ, გაკოჭონ, აუხვიონ თვალები, ფეხებით დააბან და გადმოაგდონ ისევ უკან”, _განაცხადა ვახტანგ გომელაურმა.
სახელმწიფო უსაფრთხოების სამსახურის უფროსის თქმით, არდაზიშვილი ქართველმა სამართალდამცველებმა დააკავეს და მიმდინარეობს გამოძიება.
„ჩატარდა ღონისძიება, დეტალებში მე ვერ ჩავალ და ვერ მოვყვები. გამოძიება მიმდინარეობს, მას რამდენიმე მუხლი აქვს წაყენებული და ის დღესდღეობით დაკავებულია“ - განაცხადა ვახტანგ გომელაურმა.
,,ნაციონალური მოძრაობის" წევრის გივი თარგამაძის ინფორმაციით, პირი, რომელმაც საქართველოდან ინფორმაცია უკანონოდ გაიტანა, სუს-ის ანალიტიკური სამსახურის თანამშრომელი გია არდაზიშვილია.
"მან მოახერხა უკანონო წვდომა და ანალიტიკური დეპარტამენტიდან ინფორმაცია სრული კანონდარღვევით მოიპოვა. აქ საუბარია ინფორმაციაზე, რომელიც პოლიტიკურ პარტიებს, პერსონალიებს და ხელისუფლების წარმომადგენლებს შეეხება და ძალიან დეტალიზებულია. ის მიადგა საოკუპაციო საზღვარს ცხინვალის მიმართულებით. საგულისხმოა, რომ საზღვარზე გადასვლა ძალადობრივი გზით მოახერხა. მესაზღვრეს უთხრა, რომ კონკრეტულ ღონისძიებაზე გადადიოდა, თუმცა მაინც არ გადაატარეს, რის შემდეგაც იარაღის მუქარით, მესაზღვრესთან ერთად გადავიდა, იქ კი მას შეირაღებული პირები დახვდნენ და ასეთი გზით დატოვა ტერიტორია", - განაცხადა თარგამაძემ.
მისივე თქმით, დაახლოებით, 2 სექტემბერს, საოკუპაციო ხელისუფლების წარმომადგენლებმა გადმოაგდეს ეს პირი საქართველოს მიერ კონტროლირებად ტერიტორიაზე და მიატოვეს.
"ის იყო ნაცემი. ამჟამად ის კონტრდაზვერვის დეპარტამენტს ჰყავს დაკავებული", - განაცხადა გივი თარგამაძემ და შსს-ს მოუწოდა უპასუხოს კითხვებს, თუ როგორ მოახერხა მან ინფორმაციაზე წვდომა და მისი ქვეყნიდან გატანა.
