მოქალაქე ირაკლი მახარაშვილს 2010 წელს ჩამორთმეული მიწის ნაკვეთი დაუბრუნდება. როგორც დღევანდელ მთავრობის სხდომაზე თბილისის ვიცე-მერმა დიმიტრი ქუმსიშვილმა განაცხადა, საკითხზე თბილისის მერიას ეკონომიკის სამინისტროდან და გენერალური პროკურატურიდან მიმართეს.
„ჩვენ გვაქვს მომართვა ეკონომიკის სამინისტროდან და გენერალური პროკურატურიდან მოქალაქე ივანე მახარაშვილისთვის 2010 წელს იძულებით დათმობილი 1020 კვ.მეტრის სახელმწიფოზე დაბრუნების თაობაზე, რათა შემდგომ სახელმწიფომ ბატონ ივანე მახარაშვილს აღნიშნული ქონება დაუბრუნოს. აქვე მინდა მოგახსენოთ, როდესაც ბატონ ივანე მახარაშვილს დაათმობინეს ეს ქონება, მისი შვილი დაჭერილი იყო ციხეში. შესაბამისად, იმ დროინდელი პროკურორის პირველი მოადგილის განკარგულებით მოხდა აღნიშნული დათმობა. ჩვენ ძალიან გვიხარია, რომ პროცესი აქტიურად მიმდინარეობს. თბილისის მერია აქტიურად არის ამ პროცესში ჩართული და რა თქმა უნდა, მომართვა, რომელიც იქნება განხორციელებული გენერალური პროკურატურიდან და ეკონიმიკის სამინისტროდან მყისიერად იქნება ჩვენი მხრიდან აღსრულებული", - განაცხადა დიმიტრი ქუმსიშვილმა.
ირაკლი მახარაშვილი საქართველოს მთავარმა პროკურატურამ 2010 წელს დააკავა და პროკურატურის წარმომადგენლებმა მას საპროცესო შეთანხმების გაფორმებისას არაოფიციალურად მოსთხოვეს მის საკუთრებაში არსებული მიწის ნაკვეთის სახელმწიფოს სასარგებლოდ დათმობა.
მახარაშვილმა თავისუფლების სანაცვლოდ სოფელ დიღომში მდებარე 1020 კვ.მ მიწის ნაკვეთი სახელმწიფოს სასარგებლოდ დათმო.
მერიის ინფორმაციით, აღნიშნულ საკითხთან დაკავშირებით უკვე აღიძრა სისხლის სამართლის საქმე.
,,ვინაიდან, საქართველოს იუსტიციის სამინისტროს საჯარო რეესტრიდან გამოთხოვილი დოკუმენტებით დასტურდება ირაკლი მახარაშვილის მიერ აღნიშნული მიწის ნაკვეთის შეძენისა და საკუთრებაში კანონიერი ფლობის ფაქტი, ასევე საპროცესო შეთანხმების გაფორმებამდე ერთი დღით ადრე ირაკლი მახარაშვილის მიერ მიწის უსასყიდლოდ მიტოვების ფაქტი, სასამართლოს გადაწყვეტილებით, მიწის ნაკვეთი უკან უბრუნდება მის კანონიერ მფლობელს”, _ნათქვამია მერიის განცახდებაში.
