კორტების სპეცოპერაციის საქმეზე დაკითხული სპეცრაზმელის მტკიცებით, 2006 წლის 2 მაისის სპქცოპერაციისას ცეცხლის გახსნის ბრძანება ირაკლი ფირცხალავამ გასცა, რის შემდეგაც პირველი გასროლა თბილისის სპეცრაზმის უფროსმა კახაბერ ნაკანმა განახორციელა.
ყოფილი სპეცრაზმელი იასონ მილაძე, რომლის სისხლის სამართლის საქმეც ამავე საქმეზე ცალკე წარმოებად იხილება, აცხადებს, რომ ჩვეულებისამებრ, პოლიცია ადგილზე სპეცოპერაციის შემდეგ მიდის, ხოლო იმ დღეს პოლიცია ,,ფეხებში ებლანდებოდათ” , რამაც გააკვირვა.
კითხვაზე - რა ფორმით გასცა ბრძანება ფირცხალავამ, მოწმემ აღნიშნა „ესროლეთ, ამის დედას შე...“.
მოწმემ ასევე განაცხადა, რომ 2012 წელს კახა ნაკანი და ირაკლი ფირცხალავა მას ცრუ ჩვენების მიცემას სთხოვდნენ.
„2012 წელს ჩემთან მოვიდა ჩემი თანამშრომელი და მითხრა, შეიძლება დაგიბარონ პროკურატურაში და კახა ნაკანმა დამაბარა, რომ თქვა, ვითომ იმყოფებოდი არა კორტების ტერიტორიაზე, არამედ სამგორის ტერიტორიაზეო. ასევე, შემხვდა ირაკლი ფირცხალავაც და მანაც მითხრა, რომ უნდა მიმეცა ცრუ ჩვენება, რადგან ასე იყო გადაწყვეტილი და „ვინუჟდენი“ ვიყავი, რომ ცრუ ჩვენება მიმეცა. მინდოდა, გამერკვია, რატომ მთხოვდნენ ცრუ ჩვენების მიცემას. ჯერ კახასთან ავედით ოქროყანაში. მან მითხრა, ვიღაც ქალის ჩვენებაზეა ეს საქმე აწყობილიო. ასე მითხრა, რომ უნდა მეთქვა, ვითომ ირაკლი ფირცხალავამ არა ცეცხლის გახსნის, არამედ დაკავების ბრძანება გასცა. ასევე, თქვა, რომ არ უნდა გვეხსენებინა პოლიციელები და აღნიშნა, რომ თქვენ ეს ჩვენება მიეცით და პასუხისმგებლები ჩვენ ვართო. ამის შემდეგ კი ჩვენ დაგვაკავეს“, - განაცხადა იასონ მილაძემ.
მისივე თქმით, ზურაბ ვაზაგაშვილის კუთვნილი ავტომანქანიდან სროლა არ დაუნახავს, თუმცა
მანქანიდან გასროლის შემთხვევაში, გასროლის ხმას 90 პროცენტით გაიგებდა.
ე.წ. კორტების სპეცოპერაციის საქმეზე ძალოვანი უწყების ყოფილი მაღალჩინოსნები ირაკლი ფირცხალავა, კახა ნაკანი, ლევან ბეროძე, გიორგი ცააძე და გრიგოლ კვინიკაძე არიან ბრალდებულები.
იასონ მილაძე სპეცოპერაციის ხელმძღვანელი პირების წინააღმდეგ საქმიდან გამოყოფილი საქმის ფარგლებში არის ბრალდებული. მასთან ერთად ბრალდებულები არიან რიგითი სპეცრაზმელები, რომლებმაც დახურულ სასამართლო სხდომაზე რამდენიმე დღის წინ სპეცოპერაციის ხელმძღვანელი პირების მამხილებელი ჩვენება მისცეს. იასონ მილაძეს, როგორც სხვა რიგით სპეცრაზმელებს, განზრახ მკვლელობის ბრალდება აქვს წარდგენილი.
დღესვე, ბრალდების მხარე კიდევ ორ სპეცრაზმელს დაკითხავს.
