პროკურორები სადისტებს ხელს აფარებენ და მფარველობენ, - ამის შესახებ პოლიციისთვის წინააღმდეგობის გაწევაში ბრალდებული არტურ ოგანეზოვის მამა აცხადებს და პრემიერს, პრეზიდენტს, პროკურატურას, ასევე შს სამინისტროს მისი შვილის საქმის ობიექტურად გამოძიების თხოვნით მიმართავს.
ვლადიმერ ოგანეზოვის მტკიცებით, 4 აპრილს, როდესაც მისი შვილი დააკავეს, იგი იმყოფებოდა ძველი თბილისის განყოფილებაში, სადაც ესმოდა შვილის განწირული ყვირილი, შემდგომ კი, დაინახა, როგორ ჩამოიყვანეს ნაწამები პირები განყოფილებიდან.
"ვერ ვიცანი ჩემი შვილი, გასიებულები იყვნენ ორივე ცემისგან, გაშავებულები ჰქონდათ სახეები. დღეს კი პროკურორები სადისტებს ხელს აფარებენ და მფარველობენ. ვთხოვ ღარიბაშვილს, მარგველაშვილს, შს სამინისტროს და პროკურატურას, საქმე სამართლიანად გამოიძიონ და ვისაც რა ეკუთვნის, დაისაჯოს. თუნდაც ჩემი შვილი იყოს დამნაშავე, შესაბამისად დაისაჯოს, მაგრამ სადისტები, რომლებიც პოლიციაში არიან და ახალგაზრდებს აწამებენ, გარეთ არ უნდა დადიოდნენ, - განაცხადა ოგანეზოვმა.
ექსპერტიზის დასკვნა, რომელიც პროკურატურამ სასამართლოში დღეს წარადგინა, ბაბაიანისა და ოგანეზოვის ადვოკატმა ვახტანგ გაგნიძემ გაასაჯაროვა. ადვოკატის თქმით, დასკვნაში მითითებულია, რომ ორივე ბრალდებულს მრავლობითი დაზიანებები აქვს მიყენებული სხეულის სხვადასხვა ნაწილში, თავში, ხელში, გვერდებში, ფეხებში და ა.შ.
"მითითებულია, რომ დაზიანებები არის მსუბუქი ხარისხის, მაგრამ ეს იძლევა საფუძველს აღიძრას სისხლის სამართლის საქმე სისხლის სამართლის კოდექსის 120-ე მუხლით, იმ პოლიციელების წინააღმდეგ, რომლებიც ბრალდებულების ინფორმაციით, მათ ცემაში მონაწილეობდნენ. რაც მთავარია ორივე დასკვნაში მითითებულია ის გარემოებები, რა ვითარებაშიც მიიღეს ბრალდებულებმა დაზიანებები", - განაცხადა ვახტანგ გაგნიძემ.
შეგახსენებთ, ფილიპე ბაბაიანი და არტურ ოგანეზოვი 4 აპრილს, ევროპის მოედანზე კლუბ "ნაინთან" დააკავეს. ბრალდებულები პოლიციას ფიზიკურ ანგარიშსწორებაში ადანაშაულებენ, როგორც ევროპის მოედანზე, ასევე ძველი თბილისის პოლიციის პირველ განყოფილებაში. ერთ-ერთ ბრალდებულის ინფორმაციით, მას მაჯის საათის მეშვეობით აქვს გადაღებული ფიზიკური შეურაცხყოფა, რომელსაც პოლიციელები მას აყენებენ. ოგანეზოვი და ბაბაიანი 4 აპრილს დაკავების შემდეგ ბრალდებულები არიან პოლიციისთვის წინააღმდეგობის გაწევაში. ბრალდებულების ინფორმაციით, კამათი დაიწყო კლუბში, სადაც მათ სამოქალაქო ფორმაში ჩაცმულმა პოლიციელმა ეთნიკურ ნიადაგზე შეურაცხყოფა მიაყენა, შემდეგ კი პოლიცია გამოიძახა და მათ მიმართ ანგარიშსწორების ბრძანება გასცა.
