რუსეთის საგარეო საქმეთა მინისტრი სერგეი ლავროვი აცხადებს, რომ იგი იმედს იტოვებს, რომ ევროსაბჭო ყურადღებას მიაქცევს საქართველოში მაცხოვრებელი ეროვნული უმცირესობების პრობლემას, რომელიც, ლავროვის თქმით, ძალიან მწვავედ დგას ამ ქვეყანაში.
"საქართველოს ახლანდელ ტერიტორიაზე ეროვნული უმცირესობების პრობლემა ძალიან მწვავედ დგას და იმედი მაქვს, რომ ევროსაბჭო ამ საკითხით დაკავდება. უბრალოდ, იქ მაცხოვრებელ ეროვნული უმცირესობების წარმომადგენლებს ევროსაბჭოში ჩივილის ეშინიათ, იმიტომ, რომ საქართველოს შეუძლია, როგორც ხალხი ამბობს, მათ "ჟანგბადი გადაუკეტოს". თუმცა მათ ძალიან ბევრი პრობლემა აქვთ", _ განაცხადა ლავროვმა სტრასბურგში სიტყვით გამოსვლისას.
"ჩვენ ძალიან დიდ პატივს ვცემთ ქართველ ხალხს და დარწმუნებული ვარ, რომ მოვა დრო როდესაც საქართველოს სათავეში მოვა არჩეული ხელმძღვანელი, რომელიც უპირველეს ადგილზე თავისი ხალხის ინტერესებს დააყენებს. ხოლო ამ ინტერესში კი ერთ-ერთი პირველი ადგილი უჭირავს უნარს იცხოვრო შენს მეზობლებთან ურთიერთპატივისცემის ატმოსფეროში", _ აცხადებს სერგეი ლავროვი.
