რუსეთის საგარეო საქმეთა მინისტრი სერგეი ლავროვი ევროსაბჭოს მომხსენებლების _ დევიდ უილშერისა და მათიას იორშის მიერ მომზადებული ანგარიშის კომენტირებისას აცხადებს, რომ ორმა დამოუკიდებელმა მომხსენებელმა ინგლისელმა და უნგრელმა, ისეთი დოკუმენტები შეადგინეს რომელთა შინაარსიც ერთმანეთისგან განსხვავდება. ამის გამო, ლავროვის თქმით, ასამბლეამ კონკრეტული გადაწყვეტების მიღება ვერ შეძლო.
"რამდენადაც მე ვიცი, ინგლისელმა და უნგრელმა მომხსენებლებმა ერთმანეთისგან განსხვავებული შინაარსის ანგარიში წარადგინეს. სწორედ ამ განსხვავების გამო ასამბლეამ კონკრეტული გადაწყვეტილება ვერ მიიღო და ამ საკითხის განხილვა მომავალ სხდომამდე გადადო", _ აცხადებს ლავროვი.
მისივე თქმით, იულშერმა და იორშმა რეგიონი მოინახულეს, "ისინი იყვნენ საქართველოში, აფხაზეთში. მათი ვიზიტი სამხრეთ ოსეთში ვერ შედგა, იმის გამო, რომ მომხსენებლები იქ ჩასვლას საქართველოს მხრიდან შეეცადნენ. ამის გამო, სამხრეთ ოსეთელებმა და ეს მათი სუვერენული უფლებაა მათ შესთავაზეს სამხრეთ ოსეთში რუსეთის მხრიდან, როკის გვირაბით ჩასულიყვნენ. ეს ძალიან მტკივნეული საკითხია სამხრეთ ოსეთის მოსახლეობისათვის", _ განაცხადა სერგეი ლავროვმა და დასძინა, რომ უკვე მეორე წელია ე.წ. სამხრეთ ოსეთის მოქალაქეები "ძალიან დიდი სიფრთხილით ეკიდებიან საერთაშორისო ორგანიზაციების ჩასვლას მათ ქვეყანაში იმავე გზით, რა გზითაც რესპუბლიკაში ქართული ჯარი შედიოდა".
"ასეთი იარების მოშუშება რთულია. მრავალმა ადამიანმა ცხინვალში დღემდე არაფერი არ იცის თავისი ახლობლების ბედის შესახებ, ქართველები ხომ უგზო-უკვლოდ დაკარგულებს არ აბრუნებენ", _ აცხადებს სერგეი ლავროვი.
რუსეთის საგარეო საქმეთა მინისტრი ასევე აღნიშნავს, რომ ასამბლეის ზოგი დეპუტატი "ცდილობს ამ სიტუაციის პოლიტიზირებას და ოკუპაციის შესახებ საკითხს აყენებს".
"ეს არ არის ოკუპაცია. ეს არის ის სიტუაცია, როდესაც რუსეთისა და რიგი სხვა სახელმწიფოების თვალსაზრისით გაჩნდა ორი ახალი დამოუკიდებელი სახელმწიფო რომლებთანაც მოკავშირული ურთიერთობები უნდა დავამყაროთ", _ აცხადებს ლავროვი და დასძენს: "მე ამ საკითხს ფილოსოფიურად ვუდგები. ვისაც უნდოდა გაარკვია ყველაფერი, ხოლო ვისაც არა და კვლავ აპირებს ამ თემაზე საუბარს _ ჩვენ ნამდვილად გვაქვს მათთვის გასაცემი პასუხი".