ირაკლი ფირცხალავა პროკურატურას ე.წ. კორტების სპეცოპერაციის საქმიდან გამოყოფილ საქმეზე ბრალდებულ სპეცრაზმელებთან შეთანხმებაში ადანაშაულებს.
სპეცოპერაციის ხელმძღვანელი პირების წინააღმდეგ საქმის დღევანდელი განხილვისას ფირცხალავამ განაცხადა, რომ მატროსოვის ციხეში, სადაც 7 რიგითი სპეცრაზმელი ერთ საკანშია მოთავსებული, იმყოფებოდა პროკურატურის წარმომადგენელი. მისი თქმით, თავად დაინახა როგორ გაჰყავდათ ორ-ორად რიგითი სპეცრაზმელები და როგორ ბრუნდებოდნენ ჩვენების ფურცლებით. ფირცხალავას თქმით, საკნიდან მოსმენილი ფრაზების მიხედგვით დაასკვნა, რომ პროკურატურა აპირებს, ბრალდებულთა ნაწილს საპროცესო შეთანხმება გაუფორმოს, ნაწილს კი, განრიდება.
ფირცხალავამ განაცხადა, რომ თუკი მისი ინფორმაციები გამართლდება, სასამართლო პროცესზე აღარ გამოცხადდება და უარს იტყვის ადვოკატზე და მის ინტერესებს ფორმალურად დაიცავს სახაზინო ადვოკატი.
მოსამართლე ბადრი კოჭლამაზიშვილის განმარტებით, საპროცესო შეთანხმების უფლება ყველა ბრალდებულს გააჩნია. მოსამართლემ ფირცხალავას მისამართით კიდევ ერთი განმარტება გააკეთა და აღნიშნა, რომ სხვა სისხლის სამართლის საქმეზე მიცემული ჩვენებები, მის მიერ განსახილველ საქმეს არ დაერთვება.
რაც შეეხება საქმის პროკურორს ამირან გულუაშვილს, მან აღნიშნა, რომ ფირცხალავას ინფორმაცია სიმართლეს არ შეესაბამება. მისი თქმით, მსგავს ფაქტს ადგილი არ ჰქონია, ასევე შეუძლებელია საკნის კარი ყოფილიყო ღია და მას მოესმინა ან ენახა ის რაზეც განსასჯელი საუბრობს.
