ალექსის ციპრასს საბერძნეთის მოსახლეობა უფრო მეტი გაჭირვებისა და უიმედობისკენ მიჰყავს, - ამის შესახებ გერმანიის ეკონომიკის მინისტრმა სიგმარ გაბრიელმა საბერძნეთში, 5 ივლისის რეფერენდუმის შედეგების გამოცხადების შემდეგ განაცხადა. მისივე თქმით, ქვეყანამ და მისმა მმართველმა ძალამ, რეფერენდუმით კომპრომისის ერთადერთი რეალური გზა გადაჭრეს.
საბერძნეთის ფინანსთა მინისტრი იანის ვაროუფაკისი მოლაპარაკებების ახალი რაუნდის წარმატებით დასრულების შესახებ აცხადებდა. თუმცა, რამდენიმე წუთის წინ ცნობილი გახდა, რომ მან გადადგომის შესახებ გააკეთა განცხადება. იანის ვარუფაკისმა საკუთარი ბლოგის მეშვეობით გადადგომის მიზეზი დაასახელა და აღნიშნა, რომ ევროჯგუფის ლიდერებს მოლაპარაკებებში მისი ჩართვა არ სურთ.
რეფერენდუმის შედეგებთან დაკავშირებით გერმანიის კანცლერი ანგელა მერკელი და საფრანგეთის პრეზიდენტი ფრანსუა ოლანდი შეხვედრას გამართავენ. საბერძნეთის კრედიტორები ბრიუსელში მოლაპარაკებების ახალი რაუნდის დაწყებისთვის ემზადებიან.
მმართველი პარტია სირიზას სპიკერმა Reuters-თან საუბარში განაცხადა, რომ რეფერენდუმის შედეგები პარტიას წინსვლისა და ეკონომიკური რეფორმების გაგრძელების საშუალებას მისცემს.
რეფერენდუმზე საბოლოოდ "არა" პასუხის გამარჯვების შემთხვევაში საბერძნეთსა და მის კრედიტორებს ურთიერთობა კიდევ უფრო დაიძაბება. ექსპერტები ქვეყნის ევროზონიდან გამოსვლასაც არ გამორიცხავენ და მიიჩნევენ, რომ ეს სასიკეთო არც ევროკავშირისთვის იქნება და არც საბერძნეთისთვის.
