პარლამენტის იურიდიულ საკითხთა კომიტეტის თავმჯდომარე ვახტანგ ხმალაძე ირწმუნება, რომ "სახელმწიფო უსაფრთხოების სამსახურის შესახებ" კანონპროექტით, სახელმწიფო უსაფრთხოების თვისობრივად ახალი სამსახური იქმნება. მისი მტკიცებით, სახელმწიფო თუ არასახელმწიფო დაწესებულებებში უსაფრთხოების რეჟიმის დაცვის კუთხით, ცივილიზებული მიდგომა წესდება.
,,მიდგომა, რომელიც ახლა არის წარმოდგენილი, არის ასეთი: მთავრობა თავისი დადგენილებით განსაზღვრავს, რომელია სახელმწიფო უსაფრთხოებისათვის მაღალი რისკის მქონე ობიექტი. ეს დოკუმენტი იქნება ღია და ყველას ექნება საშუალება, შეაფასოს, არის თუ არა ესა თუ ის ობიექტი ამ სიაში სწორად შეყვანილი. პრაქტიკულად შეუძლებელია ამ ნუსხაში ისეთი ობიექტის შეყვანა, როგორც არის მაგალითად, ტელევიზია, უნივერსიტეტი. თუკი ასეთი რამე მოხდება, ეს ძალიან მწვავე რეაქციას გამოიწვევს. ძნელად წარმომიდგენია მეტ-ნაკლებად პასუხისმგებლობის მქონე მთავრობა, რომელიც შეიძლება ასეთ რისკზე წავიდეს. მას შემდეგ, რაც მთავრობა განსაზღვრავს, თუ რომელია მაღალი რისკის მქონე ობიექტები, უსაფრთხოების სამსახურმა უნდა დაადგინოს ამ ობიექტისათვის უსაფრთხოების დაცვის სისტემა, სახელმწიფო უსაფრთხოების უზრუნველყოფის საჭიროებიდან გამომდინარე. სახელმწიფო უსაფრთხოების უზრუნველყოფა სახელმწიფოს ვალდებულებაა და კონკრეტული სუბიექტები ვალდებული იქნებიან იმ სისტემით დადგენილი მოთხოვნები შეასრულონ, რომელსაც უსაფრთხოების სამსახური დაადგენს. უსაფრთხოების სისტემის შექმნა, მოთხოვნების შესაბამისად, მისი დაცვის უზრუნველყოფა კონკრეტული სახელმწიფო თუ არასახელმწიფო ორგანოს ვალდებულება იქნება. მხოლოდ იმ შემთხვევაში, თუკი სახელმწიფო უსაფრთხოების სამსახურს ამ სიაში მყოფ მაღალი რისკის მქონე ობიექტთაგან რომელიმე მიმართავს თხოვნით, ეს ერთობლივად, ხელშეკრულებით გაკეთდეს, უსაფრთხოების სამსახურს შეუძლია ეს მიმართვა დააკმაყოფილოს, ასევე შეუძლია უარი თქვას ამაზე. ხელშეკრულებით განისაზღვრება თანამშრომლობის ფორმები. ეს ის ცივილიზებული მიდგომაა, რომლის დამკვიდრებაც უნდა დავიწყოთ", - განმარტა ვახტანგ ხმალაძემ პარლამენტის რიგგარეშე სხდომაზე.
"სახელმწიფო უსაფრთხოების სამსახურის შესახებ" პროექტს საპარლამენტო ოპოზიცია მკვეთრად უარყოფითად აფასებს.
