საბერძნეთში 5 ივლისისთვის დანიშნული რეფერენდუმის პასუხით, მრავალი ანალიტიკოსის შეფასებით, ევროზონის, როგორც ერთიანი იდეის არსებობის საკითხი წყდება.
რეფერენდუმზე დასმული კითხვის სრული ტექსტი ასე გამოიყურება: უნდა იყოს თუ არა გათვალისწინებული ევროკომისიის, ევროპის ცენტრალური ბანკის (ECB) და საერთაშორისო სავალუტო ფონდის (IMF) მიერ 25 ივნისს წამოყენებული ორ ნაწილიანი პროექტი? - პირველი ნაწილი "რეფორმები მიმდინარე პროგრამის დასრულებისთვის და მის შემდეგ" და მეორე ნაწილის "ვალის მდგრადობის წინასწარი ანალიზი" . პასუხები: არა/OXI, დიახ/NAI.
საბერძნეთის პრემიერ-მინისტრმა ალექსის ციპრასმა უკვე გააკეთა მინიშნება, რომ დადებითი პასუხის შემთხვევაში, მმართველი პარტია ხელისუფლების სადავეებს ჩამოშორდება, რადგან იგი ეკონომიკური რეფორმების წინააღმდეგია.
ათენმა საერთაშორისო სავალუტო ფონდს 1.6 მილიარდი ევროს ოდენობის ვალი დღეს უნდა გადაუხადოს. ვადა ვაშინგტონის დროით 18:00 საათზე იწურება.
ევროკავშირის ლიდერების განცხადებით, საერთაშორისო კრედიტორების მოთხოვნის უარყოფა ევროკავშირის ზონის დატოვებას ნიშნავს.
საბერძნეთში ბანკების მუშაობა ერთი კვირით შეჩერებულია, მოსახლეობას ბანკომატებიდან დღეში მხოლოდ 60 ევროს გამოტანა შეუძლია.
უცხოური მედიის ინფორმაციით, წინასწარ ჩატარებული კვლევების თანახმად, ამ ეტაპზე ერთმნიშვნელოვნად ვერავინ პროგნოზირებს რეფერენდუმის შედეგებს.
