საფრანგეთში, მიმდინარე საპროტესტო აქციებზე 1949 ადამიანი დააკავეს, დაშავდა 305 პოლიციელი. ამის შესახებ ქვეყნის შინაგან საქმეთა სამინისტრომ განაცხადა.
საფრანგეთის განათლების მინისტრმა, ედუარ ჟეფრემ განაცხადა, რომ სკოლის მოსწავლეების საპროტესტო აქციების გამო ხვალ 400-ზე მეტი სკოლა დაიხურება. მისივე თქმით, გაკვეთილები დისტანციურად ჩატარდება.
აქციები თავდაპირველად პარიზის რეგიონში დაიწყო და შემდეგ საფრანგეთის სხვა ქალაქებშიც გავრცელდა. მოსწავლეები, მათ შორის, კლასებში გადატვირთულობას, მასწავლებლების დეფიციტსა და განათლების სისტემის არასათანადო დაფინანსებას აპროტესტებენ.
1 ოქტომბერს საპროტესტო აქციების დროს რამდენიმე ადგილზე შეტაკებები, ხანძრები და ქონების დაზიანების შემთხვევები დაფიქსირდა. შინაგან საქმეთა მინისტრმა ლორან ნიუნეზმა მომხდარს „უკონტროლო ძალადობა“ უწოდა.
სამინისტროს ინფორმაციით, დაკავებების უმეტესობა სამართალდამცველებზე თავდასხმის, ძალადობისა და უკანონო ჯგუფურ შეკრებებში მონაწილეობის ფაქტებზე განხორციელდა.
