ერევანში საპროტესტო ტალღა შენელდა. ბაგრამიანის მოედანზე მთელი ღამის განმავლობაში რამდენიმე ასეული დემონსტრანტი რჩებოდა. მოძრაობა “არა ძარცვას” აქტივისტებმა კი მჯდომარე აქციის შეწყვეტა გადაწყვიტეს და ექსპერტთა ჯგუფის შექმნა დააანონსეს, რომელიც სამართლებრივი გზით იბრძოლებს. მასშტაბური აქციები ერევანსა და ქვეყნის დიდ ქალაქებში 19 ივნისს დაიწყო, მას შემდეგ, რაც მარეგულირებელმა კომისიამ ელექტროენერგიის ტარიფის გაზრდის გადაწყვეტილება მიიღო. პოლიციამ დემონსტრანტები აქციის მეორე დღეს ძალის გამოყენებით დაშალა, მას შემდეგ კი სამართალდამცავებს ძალა აღარ გამოუყენებიათ. როგორც ერევნის პოლიციის უფროსი ვალერი ოსიპიანი ირწმუნება, აქცია სომხეთის დედაქალაქში სავარაუდოდ 2 დღეში დასრულდება.
